Ayera mainta Corte di Prome Instancia di Aruba a dicta sentencia contra Sigfried Koolman ken tabatin ocho acusacion serio den su contra, incluyendo abuso sexual di menor, posesion di pornografia infantil y posesion ilegal di arma. Hues a condena Koolman na 10 aña di prison.

Acusacionnan un te cu seis tabata relaciona cu abuso sexual cometi contra dos menor di edad, identifica como R y W. Acusacion siete ta relaciona na posesion di pornografia infantil; y acusacion ocho ta tocado posesion ilegal di arma di candela y municion.

Dia 19 di september e tratamento di e caso a tuma luga den corte. Durante esaki e condenado a nenga tur acusacion, pero corte a determina cu e declaracionnan di e dos victimanan tabata detaya, consistente y creibel.

Den investigacion a sali cu e abuso contra R. a bira conoci despues cu su stiefmoeder a topa un mensahe sospechoso den su telefon. E abuso di W. a bira conoci pasobra R. mes ta esun cu a conta di abuso di W.

Segun declaracionnan, Koolman tabata un figura familiar den bario. El a traha na aeropuerto y pa ex-prome minister di Aruba. E tabata biba den un trailer cu tabata caminda e victimanan tabata bay pa usa wi-fi y wak television. Tur cos tabata mustra normal, pero tras di esaki tabata tuma luga abuso cu a marca e victimanan y nan famia pa resto di nan bida.

Victima R., kende ta e victima principal, a indica cu e abuso a cuminsa tempo cu e tabatin cinco aña di edad. El conta cu Koolman a cuminsa mishi cune na su parti intimo y pecho, cu y sin paña y poco poco el a cuminsa bay mas leu te ora cu tempo e tabatin siete aña, penetracion sexual a tuma luga. Esaki a sigui te ora el a cumpli 13 aña.

R. a indica cu e no tabata durf bisa nada na su mayornan pasobra e tabatin miedo cu si e bisa algo, Koolman lo haci algo malo na su mama.

Un detaye cu a duna peso na su declaracion ta cu e victima a describi un cicatriz riba bil di Koolman, un cicatriz cu polis a logra confirma cu potret.

No solamente R. tabata victima di e sospechoso Koolman, pero su amiga, W., tambe a conta cu abuso contra dje a cuminsa tempo cu e tabatin ocho of nuebe aña.

Segun su declaracion, Koolman a haci “tur cos” cu e dos mucha. Den un relato impactante, W. a bisa cu ora Koolman tabata tene relacion sexual cune, R. mester a tene su mannan pa yud’e soporta e dolor.

Pa loke ta acusacion seis, posesion di pornografia infantil, polis a descubri un link di pornografia infantil den telefon di Koolman. Koolman a insisti cu e nunca a busca ni cumpra tal material, solamente pornografia di adulto. Segun su splicacion, el a ricibi un link, pero no a logra habrie, y nunca a mira kico e tabata. No obstante, polis a haya material pornografico infantil y tambe potret y video intimo di victima R. tambe den su posesion, loke a reforsa e acusacion di posesion ilegal di material explicito cu menor di edad.

Ademas, polis a descubri seis arma di candela den cas di Koolman. Aunke e tabata miembro di un club di tiro, por lo menos un arma no tabata registra na su nomber. Segun fiscal, manera cu e arma tabata ser warda tampoco no tabata sigur, y esey a pone e menornan di edad den peliger. Victima R. mes a conta cu el a haya arma den trailer y a traha video cune.

Abogado di e condenado, Rosenstand, di su banda a ataca e testimonio di e victimanan y nan famia. Segun e, hopi parti no ta consistente, victimanan supuestamente tabata inventa of exagera, y nan relato no ta identico. El a trece dilanti cu stiefmoeder di R. supuestamente a bisa cu R. tabata sexualmente activo y cu tabatin hopi problema familiar pa motibo di un amigo nobo cada siman.

Rosenstand tambe a señala cu Koolman tin problema serio cu su pia, loke a causa e cicatriz riba su bil. Segun e, su cliente no ta fisicamente capaz di tene relacion sexual den posicion cu victimanan a describi.

Despues di repasa e caso, hues a declara den su veredicto cu tin suficiente prueba pa sostene cu e acto di abuso efectivamente a tuma luga durante un periodo largo, y cu e daño sexual y mental ta profundo. El a remarca cu e declaracion di e victimanan ta similar y consistente den e detayenan cu ambos victima a trece dilanti.

Hues a enfatisa cu e condenado no a pensa riba e daño cu e lo causa na e dos victimanan y a pensa riba mes. Pa motibo di su actonan e victimanan a keda marca pa bida y lo mester continua busca ayudo y tratamento pa maneha e trauma.

Adicionalmente hues a señala cu un di e victimanan, R., ta den tratamento psicologico intensivo y ainda ta sufri di pesadiya pa motibo di e trauma cu el a biba.

Den acusacion siete, referente na posesion di pornografia infantil, corte a rechasa e defensa di Koolman cu e no tabata consciente cu e material tabata trata di pornografia infantil. A comproba cu polis a logra habri sin problema e file cu tabata contene e material ilegal, mientras cu e condenado a sigui cumpra e mesun tipo material despues. Hues a recorda cu ley ta castiga no solamente esnan cu ta crea of bende pornografia infantil, sino tambe esnan cu ta cumpra o cu ta posee e tipo di material aki, manera den caso di Koolman.

Pa loke ta e di ocho acusacion, posesion ilegal di arma, Koolman tabatin arma registra na un club di tira y a presenta un declaracion di un ex minister di Husticia cu supuestamente duna permiso pa tin e arma na cas. Sinembargo, hues a determina cu e no a cumpli cu e rekisitonan formal pa tene arma na cas, como por ehempel, no cumpli cu e manera di warda e arma y municionnan, locual a haci cu e posesion tabata ilegal. Den evidencia tabatin incluso un video cu mustra un di e victimanan manipulando un arma di Koolman, loke a reforsa e caso contra dje.

Mirando e gravedad di e caso, hues a sigui e peticion di Ministerio Publico y a impone un castigo di 10 aña di prison, kitando loke el a sinta caba. Adicionalmente e peticion pa compensacion pa daño y perhuicio entrega pa famia di ambos victima tambe a ser aproba pa hues.