Gemeenschappelijk Hof van Justitie (Corte Comun di Husticia, Hof) di Aruba, Corsou, Sint Maarten y Boneiro, Sint Eustatius y Saba a cera e aña financiero 2025 cu un resultado practicamente neutral, segun datonan presenta den su Relato Anual 2025. E institucion hudicial a registra un resultado negativo limita di apenas Cg (Florin Caribense) 13.000, un cifra cu ta coresponde casi completamente cu e meta presupuestario original di cero.
E capitulo financiero di e relato ta mustra cu Corte a logra mantene stabilidad financiero durante un periodo caracterisa pa aumento di prijs, presion inflacionario y inversionnan den modernisacion organisacional. Na mesun tempo, e institucion a sigui inverti den personal, tecnologia, infrastructura y preparacion pa futuro.
E sistema di financiamento di Hof ta regula pa medio di e Decreto di Reino riba Financiamento di Corte Comun di Husticia. Segun e modelo aki, e presupuesto anual ta consisti di cinco componente principal: contribucion relaciona cu entrada di caso, gastonan di Hof, gastonan di Conseho di Maneho, gastonan di acomodacion y otro gastonan.
Pa 2025, e presupuesto total aproba a yega Cg 53,474 miyon. Di e suma aki, Cg 44,241 miyon tabata relaciona directamente cu e cantidad di casonan cu Corte tabata spera di trata durante e aña. E parti cu a resta tabata destina pa cubri gastonan operacional, acomodacion, administracion y proyectonan special.
Corsou a representa e parti mas grandi di e presupuesto cu Cg 20,785 miyon, sigui pa Aruba cu Cg 17,694 miyon. Boneiro, Sint Eustatius y Saba (BES) a contribui cu Cg 8,666 miyon, mientras cu Sint Maarten a aporta Cg 6,328 miyon.
Segun e relato, e presupuesto pa 2025 a ser elabora a base di prijs di costo actualisa pa e periodo 2023-2025. Contrario na algun presupuesto anterior, e calculacion pa 2025 no a ser limita pa nivelnan financiero di añanan pasa, loke a permiti un representacion mas realista di e necesidadnan operacional di Hof.
Durante 2025, e entrada total di Hof a alcansa Cg 54,475 miyon, superando e presupuesto original cu mas di un miyon florin Caribense. Compara cu 2024, esaki ta representa un aumento considerable, considerando cu e entrada total den e aña anterior tabata Cg 49,119 miyon.
E entrada principal a sigui bin for di e contribucion relaciona cu e tratamento di casonan, cu a genera Cg 44,241 miyon. Ademas, Hof a ricibi contribucion pa gastonan di acomodacion, gastonan di Corte, gastonan di Conseho di Maneho y diferente proyectonan special.
Un componente importante den e entrada anual tabata e financiamento pa e Proyecto di Mantencion di Ley y Team Bestrijding Ondermijning (TBO), cu a aporta mas di Cg 4 miyon durante 2025.
Na final di aña, e gastonan total a yega Cg 54,488 miyon. Como resultado, Hof a registra un deficit minimo di Cg 13.000.
Segun Conseho di Maneho, e desviacion minimo aki ta resultado principalmente di aumento di prijs cu a resulta mas halto di loke originalmente tabata anticipa. Sinembargo, Hof ta considera e resultado evidencia di un maneho financiero prudente y efectivo den circunstancianan economico desafiante.
E resultado negativo lo ser cubri for di e reserva operacional existente. Como consecuencia, e reserva operacional a baha un poco di Cg 1,382 miyon na final di 2024 pa Cg 1,369 miyon na final di 2025.
Manera den añanan anterior, gasto di personal a forma e categoria di gasto mas importante dentro di e organisacion. Durante 2025, gasto total di personal a alcansa Cg 35,824 miyon, un aumento di Cg 2,323 miyon compara cu 2024.
E aumento ta atribui principalmente na indexacion di salario, aumento salarial regular, contribucion di pensioen y otro obligacionnan laboral. E gastonan aki ta representa cerca di dos tercera parti di tur e gastonan di Hof.
Aunke gastonan salarial directo a keda un poco bao di presupuesto debi na vacaturanan cu no a ser yena durante aña, e spaarmento aki a ser compensa casi completamente pa medio di contratacion di personal temporal.
Gasto pa personal contrata a subi significativamente, pasando di Cg 1,603 miyon na 2024 pa Cg 3,151 miyon na 2025. Hof ta señala cu e mercado laboral bira cada biaha mas competitivo. Organisacion gubernamental, bufete di abogado y empresanan grandi regularmente ta ofrece condicionnan laboral atractivo, loke ta haci reclutamento y retencion di personal cualifica mas dificil.
Segun e relato, dependencia riba personal temporal ta resulta den gastonan mas halto y menos continuidad operacional, pero den hopi caso ta necesario pa mantene e nivel di servicio.
Mientras gasto di personal a subi, gasto operacional total a baha un poco. Den 2025, e categoria aki a suma na Cg 9,690 miyon, compara cu Cg 9,808 miyon den 2024.
Conseho di Maneho ta atribui e reduccion aki na control di gasto mas estricto y un aumento den conscientisacion financiero dentro di e organisacion.
Sinembargo, algun categoria individual si a supera e presupuesto. Entre nan tin gasto di biahe y estadia, cu a aumenta considerablemente durante e aña. Hof ta splica cu e aumento tabata necesario pa facilita mobilidad di personal entre diferente isla y pa trece capacidad adicional for di Hulanda durante periodonan cu vacaturanan tabata habri.
Ademas, e aumento mundial den prijs di ticket di avion y tarifa di hotel tambe a contribui na e gasto mas halto.
Otro categoria cu a registra aumento tabata gasto relaciona cu mudansa di personal nobo. Durante 2025, mas empleado a ser traslada entre diferente hurisdiccion of for di Hulanda cu loke inicialmente tabata anticipa.
E relato financiero ta mustra tambe cu Hof a sigui inverti den fortalecemento di su infrastructura tecnologico.
Gasto relaciona cu software, licencia, mantencion di sistema y modernisacion di tecnologia di informacion a supera e nivel originalmente presupuesta. Segun Hof, e inversion aki ta necesario pa crea un infrastructura digital moderno y prepara pa futuro.
E inversion ta forma parti di un proceso mas amplio di digitalisacion y modernisacion cu e institucion a pone central den su plan strategico multianual.
Gastonan directamente relaciona cu proceduranan hudicial a alcansa Cg 1,197 miyon den 2025, un aumento di Cg 108.000 compara cu e aña anterior.
Un di e motibonan principal pa e aumento tabata uso mas frecuente di interprete y traductornan den casonan civil y administrativo. Hof ta indica cu e desaroyo aki ta relaciona cu esfuersonan pa garantisa acceso adecua na husticia pa tur ciudadano, sin importa idioma.
Tambe a registra aumento den algun otro gasto relaciona cu tratamento di casonan civil.
Un seccion importante di e capitulo financiero ta dedica na e Proyecto di Mantencion di Ley y Team Bestrijding Ondermijning (TBO). E iniciativa aki ta enfoca riba fortalecemento di combatimento contra corupcion, fraude fiscal, malversacion di fondonan publico, falsificacion di documento y labamento di placa.
Durante 2025, Ministerio di Seguridad y Husticia di Hulanda a pone Cg 5,260 miyon disponible pa e proyecto. Di e suma aki, Cg 4,012 miyon a ser usa durante e aña.
Esaki a resulta den un suma di Cg 3,854 miyon cu a resta na final di 2025. Segun e relato, gran parti di e saldo aki ta resultado di uso incompleto den añanan anterior. Ministerio a confirma cu e suma restante lo keda disponible pa Hof pa sigui financia actividadnan relaciona cu combatimento di criminalidad.
Apart di su mesun presupuesto, Hof ta maneha tambe cantidadnan importante di placa na nomber di terceronan.
E fondonan aki ta consisti principalmente di depositonan di seguridad, pagonan destina pa expertonan y activo cu ta resultado di beslag. Pasobra e placa no ta pertenece na Hof, nan no ta forma parti di e cuentanan anual oficial.
Na final di 2025, e total di fondonan di terceronan maneha pa Hof a alcansa Cg 24,6 miyon, compara cu Cg 23,874 miyon un aña anterior.
Ademas, Hof a maneha Cg 16,27 miyon na derechonan di griffier durante 2025. Esaki ta representa un aumento significativo compara cu e total di Cg 13,06 miyon registra den 2024.
Den e conclusion di e capitulo financiero, Hof ta señala cu e plan strategico multianual 2025-2028 lo guia inversion y proyectonan durante e proximo añanan. E plan ta enfoca riba fortalecemento di e organisacion interno, garantia di continuidad di administracion di husticia, mehoracion di calidad di servicio y mitigacion di riesgonan operacional.
A pesar di inflacion, aumento di costo y incertidumbre economico mundial, e resultado financiero di 2025 ta indica cu Corte Comun di Husticia a logra mantene un posicion financiero stabiel. Na mesun momento, e institucion ta sigui inverti den capacidad humano, tecnologia y innovacion cu e meta di prepara e organisacion pa e exigencianan den e sistema hudicial di Reino den futuro.
