(AFP) – Un hues di Corte Supremo Brasileño diamars a otorga e solicitud di ex-presidente Jair Bolsonaro pa sinta temporalmente su sentencia den aresto domiciliario despues cu e sali di hospital unda e ta ricibiendo tratamento pa bronchopneumonia.
“Mi ta autorisa temporalmente aresto domiciliario humanitario… pa un periodo inicial di 90 dia,” hues Alexandre de Morae a bisa den un documento di corte obteni pa AFP, agregando cu por renoba e periodo aki den caso di necesidad medico.
E ex-presidente derechista, di 72 aña di edad, a keda sentencia cu 27 aña di prison september ultimo pa un intento di golpi di estado na 2022.
“Danki Dios!” su esposa, Michelle Bolsonaro a post riba Instagram tiki despues cu veredicto di hues a bira publico.
Desde mita di januari, Bolsonaro tabata sinta su sentencia na compleho penitenciario Papuda na Brasilia.
Dia 13 di maart el a keda admiti den un clinica priva den e capital despues di a bira malo den su cel.
Despues di mas di un siman den hospital, el a keda traslada na un camber regular di pashent dialuna.
Segun e team medico, infeccion di Bolsonaro ta resultado di un episodio di aspiracion bronchial vincula na efectonan di un herida di hincamento na su abdomen cu el a sufri mientras e tabata campaña pa presidente na 2018.
For di prison el a nombra su yiu mayor, senador Flavio Bolsonaro, como su elegido pa ta candidato pa eleccion presidencial na october.
Cu menos di siete luna faltando, algun encuesta di opinion ta mustra un bataya feroz entre e Bolsonaro mas jong y presidente iskierdista Luiz Inacio Lula da Silva, kende ta buscando un di cuatro mandato.
