(AP) – Uganda su Corte Constitucional riba diaranson a mantene e ley anti-gay cu ta permiti e condena di morto pa “homosexualidad grave” apesar di condena amplio for di gruponan cu ta boga pa e causa y otronan den exterior.
President Yoweri Museveni a firma e proposicion y converti esaki den ley den mei di aña pasa. E ley a ricibi sosten di varios den e pais Africano, unda algun ta mira esaki como comportamento cu ta bini for di exterior y no un orientacion sexual. Un activista rapidamente a priminti cu e lo apela na Corte Supremo.
Hues di Corte Constitucional a bisa cu e ley a ser aproba legalmente pa parlamento y no ta den violacion di e constitucion. Homosexualidad ya caba tabata ilegal na Uganda bao un ley di e era colonial cu ta criminalisa e actividad sexual “contra e ordo di naturalesa.” E castigo pa e ofensa aki ta cadena perpetua.
E ley den cuestion ta defini “homosexualidad grave” como casonan di relacion homosexual cu ta trata un menor y otro categorianan di personanan vulnerabel, of ora cu e persona ta infecta cu HIV. Un sospechoso condena di “intento di homosexualidad grave” por ser condena na te hasta 14 aña den prizon y e ofensa di “intento di homosexualidad” ta castigabel cu te hasta 10 aña.
Corte, sinembargo, a declara cu miembronan di e comunidad homosexual no por ser victima di discriminacion ora di busca medicamento. Uganda tabata un di e prome paisnan cu a ricibi golpi fuerte ora cu AIDS a surgi y expertonan di salud publico tin hopi tempo ta adverti contra laga e stigma of miedo di castigo impedi acceso na cuido. “Nan mester por ser acepta medicamente y culturalmente,” Hefe Diputado Husticiero Richard Buteera a comenta.
