(NLTimes) – Corte Europeo di Derecho Humano a dicta cu Rusia ta responsabel pa e caida di e vuelo MH17 y asina a viola derecho humano. Entre otro, e pais a viola e derecho riba bida, hancra den e Convenio Europeo di Derecho Humano, segun e Corte.

Esaki ta e prome biaha cu un corte internacional ta dicta sentencia riba e rol di Rusia den e bahamento di e avion di pasahero na 2014, matando 298 persona, incluyendo 196 nacionalidad Hulandes. Corte ta considera e sufrimento di e famianan di luto despues di e accidente y e perdida di nan sernan keri tambe ta constitui violacion di derecho humano.

Hulanda a apela na e corte internacional pa establece e responsabilidad di Rusia pa a tira e avion abou. E hecho cu no ta conoci exactamente ken a tira e misil no ta stroba Corte di responsabilisa e Rusonan. Ta estableci cu un soldad Ruso of un separatista pro-Ruso a tira e misil. Segun e corte, Rusia no a logra tuma accion pa preveni sufrimento humano como resultado di e lansamento di misil.

Ademas, corte a critica e fracaso di e Rusonan pa coopera cu e investigacion den e circunstancianan di e bahada. Hulanda a pidi informacion varios biaha, pero no a haya esaki. Rusia ainda ta nenga di ta envolvi den e tumbamento di e avion di pasahero.

E corte a combina e caso MH17 cu varios keho di Ucrania tocante violacion di derecho humano durante e anexion di Crimea, den oost di e pais, y durante e invasion tres aña pasa.

Rusia tabata un partido di e convencion di derecho humano te cu september 2022, pero despues a retira. E pais por ser teni responsabel ainda pa accionnan cu a tuma lugar prome cu esey. Sinembargo, e corte di Derecho Humano, cu ta vigila e convencion na nomber di conseho di Europa, no por obliga e estado condena pa cumpli cu su decision. E mester depende riba su autoridad moral.

E Conseho di e Organisacion Internacional di Aviacion Civil, cu ta cay bou di Nacion Uni, a dicta anteriormente cu Rusia ta culpabel di e accidente di MH17. Kremlin a rechasa e decision ey.

E Corte Europeo di Derecho Humano y e Conseho di Europa ta separa for di Union Europeo. E Conseho, di cual casi tur pais Europeo ta miembro, a proteha derecho humano desde Segundo Guera Mundial.

Contesta di sernan keri

Pa e familiarnan sobreviviente di e victimanan di e vuelo MH17, ta “un tremendo consuelo” cu Corte a tene Rusia responsabel pa a tira e avion abou. “E ta reconocemento di loke nos, como familiar, a conoce pa hopi tempo. Toch ta importante pa ricibi e reconocemento ey. Un pais no por djis sali for di esaki,” asina Piet Ploeg, presidente di e fundacion Vliegramp MH17 a bisa.

E echo cu e 17 huesnan di corte tabata unanime tambe ta nifica hopi pa Ploeg. El a yam’e un “tremendo sentencia” y ta spera cu e lo tin un impacto mundial riba con paisnan ta maneha cu Rusia.

“Ban spera tambe cu mundo siña di esaki,” Ploeg a bisa. E no ta spera cu gobierno Ruso lo reconoce su culpabilidad. “Tanten cu e resto di mundo sa. Esaki mester tin un impacto tambe riba opinion mundial di e accionnan di Rusia.”

Contesta di gobierno Hulandes

E hecho cu e corte Europeo di Derecho Humano tambe a tene Rusia responsabel pa e bahada di vuelo MH17 “ta un paso importante pa husticia,” asina e Prome Minister Dick Schoof a bisa riba X. “Mi pensamento awe ta cu tur e famianan di luto cu a sinti falta di nan famianan, sernan keri y amigonan pa mas cu dies aña.”

Minister demisionario, Caspar Veldcamp di Relacionnan Exterior a bay di acuerdo cu e sentencia tabata un paso pa husticia. “Pero e buki no ta cera ainda,” el a bisa. “Husticia ta funciona hopi slow.” Hulanda lo sigui “haci tur cos” pa haya husticia pa e accidente.

Veldcamp a reconoce cu Hulanda no por alivia e sufrimento di esnan cu ta den luto door di nan esfuersonan continuo. “Pero ta importante cu a keda determina unanimamente y independientemente cu Rusia ta responsabel.”

E sentencia di Corte ta nifica cu mas paso ta posibel, manera pidi un compensacion, segun Ministerio di Relacion Exterior.