Den ultimo simannan tin tema a cuminsa bin dilanti, cu aparentemente no por falta riba scenario politico di nos isla. Ta trata di e acusacionnan cu nos prome ministro ta haci uso, o mal uso, di su posicion pa percura pa trabao di abogado bay pa e bufete di cual su tata ta forma parti, y algun tempo atras, e mes tambe. Como defensa e ta trece dilanti cu no ta berdad cu el a duna instruccion na e empresanan estatal pa nan contrata exclusivamente e bufete ey.

Nos no ta bay discuti e detayenan di e asunto, contal cu ta un hecho cu e bufete a participa den e trabao legal, entre otro pa Refineria di Aruba. Tin algun ley cu ta prohibi esaki? No cu nos sa. Pero esey no ta e asunto. E asunto ta cu cada partido desde 1986 tabata haya critica cu ora nan ta den gobierno, nan ta duna trabao solamente na e bufete(nan) cu cual nan ta sinti nan mes comodo, y kico ta mas comodo cu ‘friends & family’?

Loke nos como ciudadano por observa a traves di tur e añanan ey ta cu cada partido den oposicion ta critica e practica ey, pero ora nan bolbe den gobierno nan ta haci exactamente e mesun cos. Awor, nos ta esnan cu ta kere den ‘gobernacion perfecto’ y cu esaki no ta bay sucede mas? No, pasobra tur gobierno, cu nan ta admiti of no, ta keda busca esnan cu ken nan ta sinti nan mes mas comodo, sigur si ta trata di asuntonan legal cu mester trata cu cierto confidencialidad. Sin embargo, no tin un manera pa crea reglamento pa e tipo di asunto aki, regla transparente cu ta obligatorio tanto pa gobierno como pa e entidadnan liga na gobierno, cu ta haci en todo caso cu no mester recuri na metodo cu ta kibra secreto, cu consecuencia cu cada tanto tempo prensa ta haya documentacion cu e sugerencia cu sigur esaki ta prueba di mal practica di gobierno. Manera algun tempo pasa, unda tabata circula un cantidad di factura di un bufete cu den un tempo relativamente corto a cobra un suma di mas di 200.000 florin. Un suma exagera, o un pago corecto, segun e tarifanan coriente, pa e trabao haci? Nos no sa, pasobra nos no tin un idea di kico a haci pa yega na e suma ey.

Awor, nos ta propone e democracia perfecto cu e transparencia perfecto, unda na cualkier momento tur cifra di cualkier trabao mester keda publica? Absolutamente cu no. Nos ta pro miho gobernacion, no pro crea caos. No ta pasobra tin critica, di biaha cualkier ministro mester core bay rueda di prensa cu tur su papeleo pa duna cuenta na placa chikito. Como pais bon organisa nos mester tin nos organonan di control, toch? No ta nan mester percura pa un debido control riba e asuntonan aki, y ora nan topa cu anomalia riba nan caminda, nan mester por tin e debido proceso pa nan por percura pa instanciana hudicial bay haci nan trabao, debidamente…

Pero, ta net aki nos no ta mira nada ta cambia, o al menos, esey ta nos observacion, talvez limita. Pa por kita duda, djis algun pregunta. Kico ta haciendo pa fortifica e organismonan di control? No mucho tempo pasa nos a conta e tristo storia di Centrale Accountants Dienst, cu di un servicio di mas di 20 empleado y varios registeraccountant, a para caba na un servicio cu apenas 6 empleado y un registeraccountant. Nos tin dos aña den gobernacion nobo, realmente nos no por papia di nobo mas, pero a haci un esfuerso pa fortifica e servicio aki, cu na nos nomber mester bay controla si e abogadonan, tanto esnan ‘di confiansa’, como e otronan cu a logra haya un garnachi cu a cay di mesa, a cobra pa loke nan a traha?

Ora mester traha regla di wega serio, esaki no ta toca trabao di abogado so. E mester ta un cuadro general pa gobierno y pa e otro entidadnan liga. Manera den caso di financiamento di proyecto grandi, unda mester mantene regla transparente pa tur. Esaki pa evita cu ta sucede loke a pasa recientemente, unda ta duna orden na un compania chikito di tres persona pa tuma over e trabao cu pa añanan largo Aruba Investment Bank tabata haci. Esey ta hustifica? Nos no por huzga, pasobra ta via tur tipo di rumor poco a poco e asunto a bin sali na cla. Por ta cu tabatin bon motibo pa no scoge pa e banco, pero a base di cual criterio esey a sucede? Tabatin un destaho pa esnan interesa por participa? O ta e mesun practica di semper pa scoge esnan ‘di mas confiansa’ unda ademas no tin un definicion di e termino aki?

Gobierno a bay, a bin un otro. Nos a scucha tur e promesanan cu awor si cos ta bay cambia. Por ta cu nos ta demasiado pesimista y di berdad algo ta bay cambia. Lo nos tin gana di mira e prome señalnan di institucion di un otro practica gubernamental, pero actualmente, na dos aña di gobernacion, e señalnan di cambio ta poco, y persistencia di mal custumber ta reina, atrobe, ainda.

 

LEAVE A REPLY

Please enter your comment!
Please enter your name here