(AP) – Hopi prome cu Aryna Sabalenka y Amanda Anisimova a cuminsa hunga den e final di diasabra na U.S Open, tabatin diferente hungadonan riba e veld.
Anteriormente e mainta aki, mientras cu te ainda tabata keto, muchanan y adultonan cu discapacidad tabata esnan den enfoke na Flushing Meadows. Nan a sina e partinan basico di tennis, for di con pa volley te na un backhand y a mustra esaki na e clinica di Court of Dreams.
E clinica ta crea via un partnership entre USTA y Beautiful Lives Project, un organisacion dedica na provee hende cu discapacidad e oportunidad di participa den deporte y actividadnan.
“Si bo mira nan, nan ta bira cada biaha mas miho,” Tony Gionfriddo, director ehecutivo di Beautiful Lives Project a comenta. “Y probablemente nunca antes nan a yega di haya e oportunidad aki. Awo nan sa cu ora nan bay cas nan por bisa, ‘mi a hunga tennis.’ Y porta esaki lo pusha nan na e siguiente paso y sigui siña.”
Esaki ta marca e grupo su tercer aña organisando e evento aki, y interes ta sigui crece. Giongriddo a bisa cu tabatin alrededor di 100 participante e ana aki, cual ta un aumento substancial for di e presencia anterior di alrededor di 50.
Y pa varios, e acceso na tennis aki tin un impacto grandi. Rumannan di 8 aña Skarlett y Skylar Scott recientemente a cuminsa hunga tennis, y nan famia ta mirando un diferencia den nan comportamento.
“Mi a mira hopi mehoracion den nan funcion motor, nan habilidad di por sigui direccion di varios paso y nan habilidad di por cumpli un tarea,” nan mama, Natasha Scott a comenta. “Mi stima e clinica aki.”
Beautiful Lives Project tabata funda pa Bryce Weiler y Antony Iacovone den 2017. Weiler, ken ta ciego, a keda inspira pa crea algo manera esaki despues di su propio experiencia cu University of Evansville su ekipo di basketball masculino, cual a afecta su bida di gran manera.
