Crea oportunidad pa esnan cu kier capacitacion; Scol di Ofishi di Anochi, OABA a ranca sali cu hopi determinacion

E ta rekeri hopi dedicacion y determinacion studia anochi, pero e ta un sacrificio cu ya hopi adulto, for di adulto hoben te cu pensionadonan ta haciendo pa por haya mas habilidad y oportunidad. Carlos Martinus en todo caso tin e energia y entusiasmo necesario pa percura cu comunidad di Aruba sa cu OABA tin e determinacion pa brinda e hermentnan pa logra esaki, na bienestar di tur.

OABA ta para pa Openbaar Avond Beroeps Onderwijs cu ta Enseñansa Profesional Anochi di Aruba, antes Avondleergangen Aruba (scol di ofishi di anochi) y ta opera for di edificio di EPB na Hato.

Aunke OABA ta ofrece programanan di certificacion y diploma riba tereno profesional na nivel di EPB y EPI, e ta un institucion riba su mes, pero si ta na e dirigentenan, uno cu ta bon sincronisa y den harmonia cu e otro dosnan. Meta di OABA ta pa desaroya studiantenan di e programanan di tal manera pa nan por ta mas capacita y cu nan por eherce nan profesion independientemente.

Bon Dia Aruba a sinta cu Carlos Martinus y Reginald ‘Reggie’ Havertong, Director y Director Adhunto di OABA, kendenan hunto cu Sharuska Dabian y Claudia Whitfield ta dirigi e institucion. “Mi muchanan,” ta con Martinus ta yama e studiantenan, cu ta inclui un persona di 65 aña a gradua, cu a pesar di su trabao, ta comprometi di sigui pa e di tres nivel di su estudio. “El a comprometi su mes pa dos aña largo pa tres anochi tur siman y sin faya. Y si ta faya mes, ta pasobra na trabao tin un emergencia. E ta asina ‘great’ pa mira un hende di edad tin asina motivacion.” Ta trata aki di un persona cu ya caba tabatin conocemento di electro, pero kier a hisa su capacidad. E persona aki, hunto cu su colega studiantenan a participa den e examen cu tin un duracion di 16 ora, manera ta e caso cu programanan educativo profesional na Hulanda. Ta trata examennan cu ta dirigi unicamente riba practica. “Nos kier wak si un hende ta capaz. Mi tabatin alumno cu a score un 10, pero den practica no por a haci mucho, pa falta di e capacidad. E sistema nobo di enseñansa ta permiti esaki.” (EPI tambe a cuminza cu e sistema di examen practico).

Segun Martinus, el a tuma tempo pa yega na un formula cu ta traha pa studiantenan di Aruba, y cu ta cumpli asina mes cu exigencianan di Direccion di Enseñansa. “Nos ta e di tres ruta di siñamento. Esaki ta duna nos e posibilidad, pa corta na orarionan di siñamento.” E cortamento di orario, por ehempel di cinco dia pa siman pa tres, manera e tabata antes, a rekeri planificacion, inversion den programanan nobo di les, cu ta cumpli toch cu e nivel di calidad cu Direccion y Inspeccion di Enseñansa ta exigi. “Nos a draai e scol aki un temporada cu solamente dos persona. Awor nos tin e luho, cu mas personal, cu nos por logra nos meta di 350 alumno den futuro.” Awor aki OABA tin 150 studiante, pero esey ta delibera, pa asina por brinda e organisacion e espacio y tempo pa por refina e trayectoria di e institucion. Martinus a splica.

E ta nifica si cu ta trahando pa cera lasonan cu e sector di trabao mes, pa di un banda, ofrece capacitacion na e trahadonan y di otro, produci profesionalnan cu por carga e funcionnan cu e sector tin. Por ehempel a participa den e jobfair di e sector di Food & Beverage, pa asina yega mas cerca di potencial studiantenan.

E trayecto ta reparti di tal forma cu si caba nivel dos, e persona tin e capacidad por ehempel, di ta un monteur diploma. Nivel tres ta nifica cu e persona e ora por guia un hende cu tin nivel dos. “Y nivel cuater ta nifica cu e persona, unabes diploma, por bira un gerente, supervisor, unda e mes lo haci calculacion, preparacion di trabao.”

E plan ta OABA inclui nivel cuater entrante 2027 pa e diferente trayectorianan cu tin, pa duna tempo pa desaroya material. Locual si tin ta un scol di anochi nivel cuater pa Arte y Diseño, cu a lanta e scol bao Gobierno anterior. “E ta top cu nos tine. Nos studiantenan di OABA a traha e foyetonan y premionan pa e ultimo Aruba Hi-Winds. E ta un scol di arte.”

Tanto Martinus como Havertong tin confiansa cu e scol di ofishi di anochi lo bira un solucion grandi pa Aruba pa amplia conocemento y habilidad riba diferente nivel. E programanan ta di Hulanda y tur ta certifica. Tur e programanan ta bao supervision di Direccion di Enseñansa, Inspector di Enseñansa Profesional y examenburo. Diplomanan di OABA ta reconoci pa Gobierno y sector comercial di Aruba.

Pero, scol di ofishi di anochi lo no por drei sin e compromiso di docentenan. “Nos ta hopi gradicido na nos docentenan cu tin hopi pasenshi y perseverancia, pa haci esaki cu amor. Nan tin cu traha anochi, y algun hende ta kere cu ta pa placa. Y no ta asina. E ta un ‘yamada,’” Segun e Director di OABA, nan docentenan cu ta part-time ta haya hopi goso di duna les, pasobra e ambiente ta diferente cu durante dia. “Den dia nan ta polis, mester bringa pa e alumnonan haci algo. Pero anochi, nan mes ta bin. Esun cu t’ey, ta pasobra nan kier ta na les y esey ta cambia henter e dinamica di dunamento di les.” E docentenan ta bin di EPB y EPI mes, mientras cu e docente di e nivel cuater di Arts & Design si ta full-time y ta e unico den servicio di OABA, Carlos Martinus a splica.

Bon Dia Aruba lo amplia mas riba e trabao valioso di OABA, scol di ofishi di anochi pa ilustra e oportunidad y retonan cu ta confronta, pero mas ainda, e impacto di un institucion asina aki pa progreso di Aruba.