(AP) – E creador di Netflix su “Squid Game” a bisa cu e serie di television cual su prome temporada tabata un hit, lo bini bek pa un di dos temporada, aunke mayoria serie di television na Sur Korea ta keda na un solo temporada. Danki na e gran exito global cu e serie a genera, Hwang Dong-hyuk a bisa, “mi ta sinti cu boso no a laga nos cu otro opcion.”

“Tabatin un presion grandi, y un demanda grandi cu hopi amor pa un di dos temporada,” el a bisa na e ceremonia di celebracion pa e programa riba dialuna anochi.

“E ta den mi cabes actualmente. Mi ta planeando e proceso aworaki. Pero mi ta kere ta hopi trempan pa bisa ki ora y den ki tempo esaki lo pasa, pero mi ta priminti boso cu Gi-hun lo bini bek y e lo haci algo pa e mundo,” Hwang a splica.

Netflix te ainda no a formalmente anuncia e di dos temporada. E serie, cu Lee Jung-Jae interpretando e personahe principal, Song Gi-hun, y otronan den e elenco, ta trata tocante e hendenan cu ta asina desespera pa placa cu nan ta i acuerdo pa tuma parti den weganan di mucha cu tin un condicion mortal.

E drama aki di Sur Korea ta premira di bira Netflix su programa di television mas grandi, Cu e exito aki, a bini hopi reconocimento na e actornan cu a participa den esaki.

E modelo cu a bira actris Jung Ho-yeon ta custuma n biahenan pa motibonan relaciona cu moda. Pero e biaha aki, ora el a biaha di Sur Korea pa Los Angeles, el a conoce su prome fanatico na airport, un oficial di inmigracion ken a pidi su persona pa su prome autografia.

Actor Park Hae-soo, ken ta interpreta e personahe di Jo Sang-woo den e serie, a bisa el a “tuma e gran decision” di habri un cuenta di Instagram.

“Awo mi echt kier a comunica cu e mundo y tur hende, pa e motibo aki mi a habri mi mesun cuenta di Instagram,” Park a expresa.

E actor principal, Lee Jung-Jae tin mas di 25 aña ta traha na Korea. Awo su bida a cambia pa motibo cu e ta reconoci te hasta riba e cayanan di Merca.

“E ta increibel, no? Hende ta djis cana bin cerca bo y cumindabo,” Lee a conta. “Mi no tabata sa con pa reacciona ni responde na tur e amor y aprecio cu mi tabata ricibiendo. E ta un gran sentimento di por conoce tur e fanaticonan cu a stima y wak e programa asina hopi.”

E elenco y creador tin soñonan di traha cu produccion di Hollywood algun dia, cu Jung bisando “boso yama nos agente!”