Aruba su industria di turismo ta regarda como un di esnan mas fuerte y solido cu tin den e region, y esaki ta sigui e caso a pesar cu e demas islanan, den e caso aki Corsou, ta mirando crecemento fuerte y significante den su propio industria di turismo, cu proyeccion positivo den bista.

E siman aki a cuminsa circula e noticia cu e turismo di Corsou tabata mas fuerte cu Aruba y resto di e region, sinembargo e cifranan ta mustra cu si tuma e resultadonan mas reciente di ambos Aruba y Corsou, turismo te ainda ta mirando bon resultado na Aruba, cual ta sostene su posicion como un di e industria di turismo mas fuerte den e region.

Corsou a yega e logro di surpasa 1.1 miyon bishitante durante e prome 8 luna di aña 2025, esaki segun e reportahe di turismo publica pa augustus for di Curaçao Hotel and Tourism Association (CHATA).

E crecemento aki tabata impulsa mas tanto a causa di un aumento den e bishitantenan di crucero y dia. Solamente den augustus, aparentemente e yegadanan a aumenta cu mas di 23 porciento na net un poco mas cu 115.000 bishitante, cu turismo di crucero responsable pa e aumento mas drastico, cu casi 51.000 pasahero. Esaki a marca un aumento di 59% compara cu augustus di 2024. Turismo ‘stayover’ tambe a mira un aumento aunke esaki tabata solamente di 4% na mas di 60.000 yegada.

Di otro banda, a pesar di un disminucion chikito den e tasa di ocupacion durante augustus, hotelnan a genera mas entrada cu e tasa di camber diario averahe aumentando cu casi 11% na 254 dollar, mientras cu e entrada pa camber disponible a aumenta cu casi 8% na 184 dollar.

Pa loke ta trata e periodo di januari pa augustus, Corsou su ocupacion na hotel tabatin un averahe di mas di 76%, un mehoracion cla compara cu e mesun periodo aña pasa unda a mira 72.5%. Juni ta unda tabatin e crecemento mas fuerte, cu ocupacion creciendo for di 64.5 porciento na 70 porciento. Juli a keda stabiel, mientras cu augustus tabatin un disminucion chikito.

For di januari te cu augustus, Corsou a ricibi un total di 527.412 turista ‘stayover’ – cual a marca un aumento di 13.7%. E asina yama ‘Day visitors’ a bira casi dobbel, cu un aumento di 92.9% na 31.028. Yegadanan di crucero pa e mesun periodo aki a registra un disminucion chikito di 0.5%, yegando un total di 559.641 pasahero.

CHATA a describi e resultadonan aki como un señal di resiliencia y popularidad creciente di Corsou como un destino, mirando cu e organisacion ta anticipa cu lo cera 2025 como un aña cu a kibra record pa e isla su industria di turismo. Esaki ta pone na mesa un comparacion cu Aruba, cual ta ampliamente regarda como un di e destinonan mas popular y conoci pa turismo, y ta trece dilanti e pregunta di con Aruba ta para den comparacion cu Corsou.

Pa por yega na un comparacion lo mas igual y husto posibel, nos tin cu mira e cifranan di Aruba pa e mesun lunanan aki.

Cuminsando cu augustus, den caso di Aruba e luna aki a mira un total di 132.728 yegada. Solamente mirando e yegadanan den e luna aki, nos por mira caba un diferencia entre e dos islanan. Tambe a remarca cu den e luna aki pa prome biaha Argentina a consolida su mes como e mercado number 1 di Latino America pa Aruba y esaki a trece un crecemento di 126.5% te cu augustus di e aña aki.

Den e mesun categoria di ‘stayover’, manera menciona Aruba a ricibi un total di 132.728 turista ‘stayover’, cual a representa un crecemento di 5.3% compara cu augustus di 2024, traduci na un aumento absoluto di 6,670 bishitante, cu e aumento mas notable di Latino America. Den e mesun categoria aki, Corsou a mira un aumento di 4% cu mas di 60.000 yegada den augustus, esaki ta duna e bista cu te ainda Aruba su crecemento turistico, por lo menos den e categoria aki, ta sigui riba un bon caminda.

Pa loke ta turismo di crucero, tambe por compara cu na Aruba nos a mira 605.183 turista, mientras cu Corsou, contando cu un aumento, a mira 51.000 pasahero. Aki tambe por mira cu Aruba ta conta cu mas yegada ora di tira un bista na e industria di turismo crucero na e otro islanan.

Si tuma un momento pa analisa e demas lunanan anteriormente e aña aki, for di januari Aruba su turismo a cuminsa cu resultadonan sumamente positivo, registrando cu ya den januari di 2025 a mira un resultado positivo adicional den ‘stayover’ di 4.7%, a comparacion cu januari di 2024. Den januari di 2025, a ricibi un total di 124.787 turista ‘stayover’, cual ta e crecemento menciona unda a ricibi 119.194 huesped stayover den 2024.

E mesun aki por ser bisa pa e luna di februari, unda a mira atrobe un resultado positivo adicional di 4.7% compara cu februari di 2024. Sinembargo den e luna aki Aruba a ricibi un total di 115.560 huesped ‘stayover’, cual compara cu februari di 2024 unda a ricibi 122.149 huesped ‘stayover’, ta un disminucion di 5.4%.

Si tuma esaki na cuenta, aunke e industria di turismo di Corsou ta mirando un crecemento y tin bon pronostico su dilanti, e industria di turismo na Aruba ta keda robusto, stabiel y den bon caminda, manteniendo su posicion como un di e islanan stima y preferi ora di tuma vakantie na nivel regional y mas aleu.

Un aspecto cu ta notando, ta cu aunke turismo ta sigui crece den varios area, e impacto aki no ta resona ni mira den tur banda di manera igual. Anteriormente caba nos a yega di papia tocante e impacto cu vacation rentals tin riba varios diferente aspecto di turismo, y esaki ta keda un preocupacion. Den edicion recien di Bon Dia Aruba a publica tambe e declaracionnan tocante e grado di ocupacion na hotelnan cu ta den disminucion a pesar cu nos ta mirando aumento y bon resultado mensual den nos industria di turismo.

Aunke te ainda nos turismo ta fuerte y robusto, tin preocupacionnan cu mester atende cune urgente pa mantene e posicion fuerte y solido cu nos ta conta cune.