Atacante estelar di Portugal y Juventus Cristiano Ronaldo a test positivopa Covid-19, segun anuncio di federacion di futbol Portugues (FPF).

E hungador di 35 aña, segun e declaracion di FPF ta “den bon condicion, sin sintoma, y den isolacion.” Portugal ta enfrenta Suecia awe, diarazon, den un partido valido pa e grupo di Nations League.

E demas hungadornan di e equipo di Portugal, bao guia di Fernando Santos, a test negativo pa Covid-19 y ta disponible pa e seleccion.

Portugal a keda na un empate diadomingo pasa di 0-0 contra Francia, unda Ronaldo a participa. Portugal ta ariba den clasificacion den e grupo, igual den punto cu e campeonnan mundial.

Ronaldo, capitan di e seleccion di Portugal, a bira recientemente e promer Europeo pa anota 100 gol den partidonan internacional den futbol profesional, cu Portugal venciendo Suecia na september den e otro encuentro contra e pais ey den Nations League.

Como consecuencia di su periodo di isolacion, Ronaldo lo perde partido pa Juventus di Serie A contra Crotone dia 17 y di Champions League contra Dynamo Kiev dia 20 di october. E campeon Italiano ta enfrenta Verona den Serie A dia 25 di october y Barcelona den nan segundo partido di grupo di Europeo dia 28 di october.

Ronaldo a post un selfie cu seleccion di Portugal riba medionan social dialuna anochi cu e caption “Uni riba y fuera di cancha!”

Hungadornan conoci cu a test positivo pa Covid-19 recientemente ta inclui Neymar, Kylian Mbappé, Paul Pogba, Paulo Dybala, Angel Di María, Zlatan Ibrahimovic y Diego Costa.

LEAVE A REPLY

Please enter your comment!
Please enter your name here