Michelle La Haye, director di Cruz Cora Aruba ta splica cu ainda St. Maarten ta den un situacion di emergencia y esaki ta e tipo di ayudo cu boluntarionan di Cruz Cora Aruba ta brinda hunto cu nan coleganan di otro islanan y demas boluntarionan.

Trabounan di Cruz Cora ta encera te cu e momentonan aki, sondeo di e pais afecta, asisti den e shelter nan, distribucion di awa, un post na Airport SXM, ta yuda na e helpdesk y tracing the missing entre otro.

Na momento cu e sondeo ta completo, lo e ora tin un miho idea kico ta loke ta e plan di accion. “Pa e motibo aki, kier pidi comprension tambe di comunidad ya cu aworaki ta enfocando riba ayudo basico y di prome auxilio. Y percura pa structura tur accion na su momento teniendo na cuenta logistica”, asina e organisacion ta laga sa.

Esunnan cu kier duna placa por haci esaki riba e cuentanan bancario cu por haya riba nan Facebook. Cruz Cora kier enfatisa cu nan no ta aceptando paña y tampoco ta hiba pakete personal na St. Maarten. Esun cu kier yuda cu productonan por entrega nan entre 9or di mainta pa 2or di atardi na nan oficina. Manera producto di bleki, aroz, lechi, ensure, pampers producto di higiena personal y vitamine C. Pa e cuminda nan ta pidi cu e fecha no ta vence den e proximo 6 luna.

Prome minister na St. Maarten
Prome minister Mike Eman a bishita un bario caminda hopi famia Arubiano ta residencia. Aki el a mira con nan a perde nan cas y e situacion desastroso. “Mi ta hopi conmovi. Loke nos a mira di prome instante, di por organisa pa e famia di esnan cu a wordo afecta pa bay Aruba y cabes di famia por keda y reconstrui, a cuminsa caba.”

Dennis Hillisson, por ehempel, su casa ta Arubiano y hunto cu nan yiu a sali antayera den e vuelo cu minister Mike de Meza a yega y bay cu hopi hende bek Aruba. E ta conta cu awo por sigui traha sin preocupa pa nan salud. Famia Bosch ta cla pa ricibi nan aki na Aruba. Cu 40 aña cu e tin ta biba na St. Maarten, sr. Hillisson ta conta cu esaki ta e di 6 horcan cu e ta pasa aden, pero sigur esun pio. El a pasa den Louis cu tabata categoria 4 y Gonzalo dos aña pasa a zink su cas flotante, pero asina mes ta sigui traha. Esaki ta informacion for di un relato di gobierno.

Prome minister tambe a topa miembronan di Arumil. Entre otro Jean Marc Trimon cu a caba di yega e dia prome for di su warda na prizon, caminda mester cuida pasobra horcan a basha un di e murayanan di e prizon abou.

Mas ayudo for di Aruba
Mas y mas instancianan ta yuda cu donacion di productonan of pa recauda fondo pa e victimanan di horcan Irma na St. Maarten y e otro islanan Saba y St. Eustatius. Manera Metacorp cu a manda un container cu alrededor di 2 mil caha di awa pa St. Maarten. Carubbian Festival awe na San Nicolas ta celebra den un forma unda ta pidi tur un contribucion pa asina yuda e islanan ruman. YMCA San Nicolas ta organisa riba diasabra 16 di september di 9or di mainta pa 5or di atardi un Hurriacne Relief Benefit bou nomber Hope.