E fundacion a cuminsa como un iniciativa pa trece solucion na un problema social cu e hubentud di bario Sabana Basora Noord tabatin. Na medida cu a ripara con e violencia a cuminsa aumenta, el a dicidi di pone man na obra, y na luga di keda parti di e problema, Rafael Figuereo a dicidi di haci algo positivo pa yuda e muchanan y por scapa nan mas cu por di e violencia cu tabatin reinando den e tempo aki.

Na luga di laga e solucion den man di otro hende, y warda pa e muchanan haya ayudo, el a sinti e necesidad y responsabilidad di yuda e hobennan aki. “Mi tambe tin yiu, y unabes cu bo ta wak cu e futuro di e hobennan aki tabata bayendo perdi, bo ta pensa tambe riba bo yiunan,” Rafael a declara, treciendo dilanti cu el a tuma e responsabilidad aki cu facilidad. “E bario aki, nos tur ta biba den dje, y esey kiermen cu e positivo di e bario ta beneficia tur esunnan cu ta biba den dje. Ora cu bo ta biba den un bario sigur, bo tin un famia cu tambe ta sinti sigur.”

E iniciativa di trece solucion pa e bario, inicialmente no tabata uno bon ricibi cu e bisiñanan. Sinembargo, unabes cu e residentenan di e bario a cuminsa mira e bon trabao y resultado di e proyecto y actividadnan cu Rafael tabata haci, causando cu tabatin menos bringamento, menos hortamento, menos droga manera cuminsamento, nan a cuminsa apoya esaki y kere den e trabao cu Rafael tabata haci.

Fundacion Centro Familiar Sabana Basora a lanta, danki na e sentimento di responsabilidad cu Rafael a tuma den su man, pa e amor cu e ta sinti pa su bario y e hubentud cu ta biba den esaki. “E ta algo cu nos mes no tabata spera,” Rafael a comenta. Unabes cu el a cuminsa traha cu e hobennan di e bario, el a haci un estudio social pa asina yega na e motibo dicon e hubentud a sali for di man den e bario. Y el a realisa cu ta cuminsa for di tempo cu nan tabata chikito, door di nan famia y nan mayornan. “Corda bon cu esaki ta un bario caminda bo ta haya mamana cu 3 of 4 yiu cu no tin e tatanan den e cas, kiermen e mamanan so tabata carga e responsabilidadnan aki y e ta un trabao dificil pa un mama soltero.”

Asina aki a logra realisa cu esey ta unda e raiz di e problema tabata sinta. Rafael, hunto cu su famia y boluntarionan di e bario, a bini cu diferente proyecto pa fortalese esun existente di traha cu e hobennan. Na e momento aki a dicidi di traha cu e mayornan y e muchanan chikito tambe cu tabata forma parti di e contorno di e hobennan aki.

E trabao a bira uno mas facil. Pa motibo cu ya tabatin un fundeshi danki na e trabao cu Rafael ya tabata haciendo den bario, trabao cu a crece te cu el a bira un fundacion cu a haya e aceptacion di bario, di e mayornan y participacion di e muchanan den e actividnan aki. Sinembargo, esaki tambe a ocasiona cu a trece hopi mas gasto, y mester inverti mas den e proyectonan cu kier realisa. Esaki a causa cu “a yega e momento cu nos mes no por a yega na e fondo manera nos a haci for di cuminsamento. Nos tabatin mas o menos 40 hoben, si no mas, kendenan nos tabata duna cos di come, di bebe, casi tur dia tabatin actividad pa nan,” Rafael a expresa.

E peso financiero a bira mas grandi, causando cu e fundacion mester a cuminsa bati porta na otro instancianan, cu a ricibi e fundacion cu mannan habri, y a brinda un gran sosten. E peso financiero a bira uno menos pisa, y a duna oportunidad di por inverti mas den e proyectonan pa e mucha- y hobennan di e bario. Pero tambe a duna e fundacion mas stabilidad financiero y forsa pa sigui trece proyectonan nobo y mas amplio.

E forsa y stabilidad financiero a yuda mantene un parti integro di e trabao cu e fundacion ta haci den e bario. Pa medio di e estudio social haci, tambe a mira cu un di e problemanan grandi ta e forsa financiero di e famianan aki. “Bo ta haya mama- of mayornan cu no por manda e yiunan un traimerdia por ehempel, of por duna e sosten cu e mucha merece pa un educacion optimal.” Como un intento pa soluciona esaki, y por lo menos alivia e peso riba e mayornan, Rafael a dicidi di tuma e peso y responsabilidad aki riba lomba di e fundacion, y haci e fundacion uno sin fines di lucro, nificando cu tur e ayudo ta gratuito pa e muchanan. “Asina nos por a facilita y flexibilisa e calidad di bida di nos muchanan, y e mayornan tambe.”

Tabatin un soño di logra tin mas tanto posibel e muchanan di bario den un ambiente sano y sigur, caminda cu e muchanan lo por yega na momento di sali for di scol. “Hopi biaha e muchanan tabata sali for di scol, yega cas, y no tabatin un tayo di cuminda ta warda nan,” hopi biaha e falta di control tambe tabata causa cu e muchanan tabata sali riba caya.

E soño a bira un realidad na momento cu e fundacion a logra habri un traimerdia sin costo algun, unda cu e muchanan ta bini despues di scol, y haya cuminda cayente, ayudo cu huiswerk, y diferente actividad despues di caba cu nan tareanan di scol. “Esaki ta un di e proyectonan mas grandi y bunita cu nos ta realisando pa un aña caba.”

E fundacion aki ta trece dilanti un bunita mensahe, unda cu nos por mira e gran ayudo cu nos por brindan a nos Isla, si na luga di para na banda, nos tur pone di nos parti y uni tur nos forsa, nos por trece solucion y ayudo na nos hubentud y comunidad.

“Si cada un di nos pone di nos parti y uni nos forsa pa yuda, indiscutibelmente di ken nos ta papiando, nos por yuda nos hubentud crece di un manera saludabel, fisicamente, socialmente y culturalmente,” Rafael a clausura.

LEAVE A REPLY

Please enter your comment!
Please enter your name here