Ayera mainta, Fundacion Hunga Teca ubica na YMCA San Nicolas hunto cu Kiwanis Club of Palm Beach y su proyecto Squla a haci entrega oficial di tabletnan pa muchanan di varios klas di Scol basico Santa Filomena di San Nicolas.

Yamila Hoevertsz-Kock presidente di Hunga Teca a expresa cu e dia di ayera tabata un dia grandi, na unda nan a haci entrega oficial di tabletnan cu a wordo duna door di Kiwanis Club of Palm Beach Aruba, e scol cu nan a adopta e aña aki ta Santa Filomena di San Nicolas.

Hoevertsz-Kock a expresa cu e muchanan lo haya di e manera aki loke nan ta yama ‘Remedial Teaching’ loke ta nifica di programanan special cu e maestronan por uza si e muchanan no por compronde un materia bon di un manera of tambe muchanan cu tin problema pa siña y pa via di esaki por hunga y compronde miho nan estudio.

Di mesun manera, el a informa cu e muchanan a haya 17 tablet pa cuminsa y cu esaki ta bay ta suficiente, dos tablet pa klas di cual s Santa Filomena tin den ocho klas, tambe a expresa cu nan tin e conviccion cu pa otro aña escolar nan lo tin mas tablet pa mas mucha.

Mario Nooyen cabesante di scol Santa Filomena a gradici pa Fundacion Hunga Teca pa por traha hunto cu nan y asina nan por haya e regalo di Kiwanis Club cu ta super pa e muchanan, hopi educativo di loke ta trata e ‘21 Century Skills’ cu e cual nan tin cu traha nan propio habilidad y prepara bon pa nan futuro.

Nooyen a bisa cu nan tin tempo trahando hunto cu Hunga Teca y ademas a declara cu e scol a cuminsa algun tempo atras cu flatscreens den tur klas y asina nan ta cu e proximo paso cu ta e tablet cu lo yuda muchanan pa bay mas lihe of mas abou den nan tempo y asina nan por traha den nan mesun nivel.

Tocante e parti di digitalisacion cu ta den proceso, Nooyen a señala cu ainda ta falta hopi, esey ta depende di placa cu semper ta e problema pa scol, aunke nan semper ta haci nan best pa nan por haya fondonan lihe pa asina e muchanan por haya e hermentnan.

Di su parti, Anuesca Baly Director di SKOA a trece dilanti cu nan semper ta sostene e parti di digitalisacion den tur scol y a gradici pa Fundacion Hunga Teca cu a adopta un di scol basico na San Nicolas y tambe hunto cu Kiwanis Club of Palm Beach.

El a bisa cu ta bon pa otro instancianan haci esaki y asina nan por yega na e metanan cu nan tin dentro di cinco aña, caminda cu tur scol mester ta digitalisa, manera tur hende sa, tur mucha mester wordo prepara cu ‘21 Century Skills’ awendia y cu esaki ta representa un paso chikito pa esey.

Asina mes, Baly a expresa cu Kiwanis Club of Palm Beach lo sigui monitoria e proceso aki y tambe nan lo sigui wak con por sigui inverti den proyecto aki, e programa Squla tambe ta bin pa kleuter school te cu scol basico na unda nan ta espera cu tambe por introduci esey den otro scol cerca di Santa Filomena na San Nicolas y esey lo ta hopi bon pa motibo cu e grupo di scolnan lo haya nan base pa e muchanan por sigui e caminda pa scol secundario.

Tocante e fondonan necesario pa yega te e meta ey, Baly a menciona cu nan no tin e fondonan, nan a haci diferente apelacion y nan a haya den caso aki scol Cacique Macuarima cu a wordo adopta door di Futura y cu esaki nan ta espera cu den cinco aña e 46 scol cu ta pertenece pa SKOA mester di basta placa pa sostene e proyecto aki, di loke ta trata e inversion Baly a informa cu nan tin un proyecto cu ta di casi 12 miyon florin pa tur scol cu tambe ta encera pa duna e docentenan entrenamento pa por haci esaki den klasnan, pa motibo cu no ta un cuestion di pone e tabletnan den scol sino cu henter scol mester wordo prepara.

Ivan NG Presidente di Kiwanis Club of Palm Beach a anuncia cu prome cu esaki nan a haci un sondeo pa wak di kico e proyecto ta trata, con muchanan ta haya otro manera pa siña, specialmente scolnan y maestronan cu Kiwanis Club tambe ta apoya y nan ta buscando diferente manera pa por mustra y guia pa tin un miho educacion, el a bisa cu nan a haya esaki como algo cu nan tin cu haci y ta den nan tarea pa haci.

Asina mes, el a afirma cu nan tin un programa cu ta yama ‘Youth Community Priority One’ cu ta cay abou di e parti na unda nan ta apoya tur e proyectonan ey.