Parlamentario John Hart ta preocupa cu e situacion di transporte publico na Aruba. Segun declaracion di minister Dowers den Arubus tin indicacion cu tin basta asunto pa ahusta pa motibo di e mal maneho den pasado di mandatario anterior.
“Un reto grandi pa atende cune den nos transporte publico ta Arubus, primordialmente e reto financiero precario,” parlamentario Hart a declara. Segun informacion, Arubus tin un debe na gobierno di 19 miyon florin.
Hart a indica cu transporte publico mester ta sigur, accesibel y eficiente pa tur hende, tanto pa ciudadano y turista. Pero pa promove y garantisa e meta aki, ta necesario pa haci un revision di leynan existente, gobierno mester atende cu e maneho di departamentonan concerni y tambe mester atende cu e situacion financiero.
Ta un echo cu e situacion financiero di Arubusta precario. Parlamentario Hart a indica cu gobierno ta na un crusada cu mester tuma decision, of ta keda haci ‘business as usual’ of ta bay soluciona e problemanan cu e gobierno anterior a laga atras. E situacion precario di Arubus ta andando pa hopi aña caba.
Pareu cu esey, pa hopi tempo caba tin discusion andando cu trahadornan di Arubus pa mehoracion di nan CAO y condicionnan di trabou. Ta di lamenta cu e problemanan aki no a wordo soluciona den pasado. Tambe por tuma nota cu diferente parada di bus existente ta den deterioro y tambe ta necesario pa laga traha mas parada di bus.
Parlamentario Hart lo manda un carta na minister Dowers pa bin Parlamento di Aruba y duna claridad tocante e situacion financiero di Arubus pa asina por discuti solucionnan pa transporte publico pa Pais Aruba.
