E siman aki a tuma nota di un usuario riba Facebook cu a publica e schedule di cruise ship pa luna di december. Den su publicacion el a expresa su preocupacion pa e cantidad di crucero cu lo bishita nos isla durante “high season” aki y kico e entrada masivo di turista lo trece pa nos isla.

Manera ta conoci caba, den temporada di high season e sector di Turismo ta mira un aumento skerpi den bishitantenan di afo. Esaki no ta algo nobo, y ta algo cu pa añas caba ta anticipa durante temporada di zomervakantie y Pasco/Aña Nobo. Sinembargo, den e ultimo añanan perspectiva local pa turismo ta birando cada bes mas negativo, unda hopi ta haciendo yamado na gobierno y autoridadnan pa tuma medidanan mas concreto pa reduci e presion di turismo riba nos isla.

E topico atrobe a ser treci dilanti riba Facebook unda un usuario a publica e cronogramo di barco crucero pa luna di december. Den e publicacion ta mustra tres diferente potret unda por mira cu casi tur dia den luna di december, lo tin un barco crucero cu lo staciona na Oranjestad y unda miles di turista lo pone pia riba nos tera. Aunke algun ta yama esaki un oportunidad beneficioso pa economia di Aruba, otronan ta enfatisa cu e entrada di turista aki lo causa daño.

Algun comentario ta contradeci e argumento cu e entrada di turista lo engrandece nos economia, unda varios ta bisa cu turistanan riba crucero no ta gasta mucho placa durante nan bishita pasobra mayoria ta cumpra souvenir manera T-shirt of otro tipo di mercancia haya den bisindario. Segun cifra di 2024 di e Florida-Caribbean Cruise Association (FCCA), e suma promedio gasta pa cada pasahero ta rond di 130 dollar riba nos Isla. Analisis di crucero den e region tambe a mustra cu gran parti di e gasto ta relaciona cu tours y compranan di productonan luho manera holoshi y joyas. Cuminda y bebida ta cay na di tres luga, y facilidadnan of productonan local manera artesania, souvenir y hasta servicionan di taxi ta cay fuera di e top 5 fuente di gasto.

Den comentarionan di e publicacion tambe por a mira algun expresando nan preocupacion pa nos playanan, subrayando cu lo mira sobrepoblacion cu lo trece e riesgo di mas sushi na canto di lama. Ademas a nota e impacto ambiental cu lo mira a causa di emision di barconan crucero.

Na 2022 caba, Bon Dia Aruba a trece e tema aki dilanti unda a reporta cu biahe riba crucero ta genera hopi mas contaminacion cu biahe via avion. Den nan inventario di emision, e Conseho Internacional riba Transporte Limpi (ICCT) a haya cu e cruceronan mas grandi y eficiente ta emiti como 250 gCO2/pax-km. Basa riba e data den e inventario di emision di avion transatlantico mas recien di e conseho, e intensidad averahe di carbon di e industria ta varia di aproximadamente 10 gCO2/pax-km na 130 gCO2/pax-km, mientras vuelonan mas largo tin un intensidad di carbon mas abao. Na 2mil kilometer, e intensidad averahe di carbon ta aproximadamente 80 gCO2/pax-km. Y esey ta pa CO2 so.

Crucero tambe ta un hotel flotante, pues tambe mester considera emisionnan di estadia di hotel pa esnan cu ta bula riba avion. Pero hasta asina, un pasahero riba crucero ta emiti como dos biaha mas CO2 cu un persona cu ta biaha riba avion y ta keda na hotel.

Ademas, ta importante pa sa cu cruceronan nobo cada bes mas ta opta pa methaan como combustible, den forma di LNG. Ta calcula cu mita di crucero nobo siendo construi awendia ta core riba LNG. Mientras esaki ta reduci emisionnan directo den aire, e tipo di motor cu cruceronan ta usa ta leak methaan sin kima den atmosfera. Esaki ta yama “methane slip”, y e emisionnan “life cycle” di gas di invernadero for di e motornan aki ta resulta mas halto cu usa marine gas oil di menos sulfur, segun investigacion di ICCT.

Pa e cruceronan cu no ta core riba LNG, hopi ta usando “scrubbers” cu ta manda e contaminacion back for di aire den awa. E awa descarga pa e scrubber ta contamina cu substancianan conoci como polycyclic aromatic hydrocarbons y metalnan pisa cu ta vincula cu cancer y problemanan reproductivo den animalnan di lama. Tur esaki djis pa cruceronan por continua usando heavy fuel oil mas barata na lugar di combustible cu menos sulfur pa cumpli cu Organisacion Maritimo Internacional su regulacionnan di sulfur den combustible.

Desafortunadamente, ICCT ta calcula cu uso di scrubbers ta resulta den emisionnan directo y “life cycle” di CO2 mas halto cu uso di marine gas oil, como tambe mas emision di materia particula halto, incluyendo carbon preto cu ta contribui na kentamento global.

Tambe ta existi un riesgo riba salud publico. Na december 2024 a detecta norovirus riba un barco crucero cu a pasa dia riba nos isla. E tempo ey, E Centro di Control y Prevencion di Malesa (CDC) a reporta cu 74 di e 1.923 pasahero cu tabatin abordo–cual ta menos di cuatro porciento di e pasaheronan–ademas di cuatro di e 757 miembro di tripulacion di e barco a bira malo, experimentando sintoma cu ta inclui diarea, sacamento, dolor di bariga, dolor di cabes y kentura. E barco aki a desembarca for di Port Lauderdale, Merca. Poco tempo despues, den januari di e aña, a mira un bes mas un brote di norovirus riba un barco crucero cu den e dianan anterior a pasa den a islanan ABC. Norovirus ta altamente contagioso y “e causa principal di sacamento y diarea, y di malesa transmiti via cuminda na Merca,” segun CDC.

Aunke no a detecta ningun persona local cu a bira malo di e virus, e casonan aki a causa preocupacion den comunidad.

Medidanan sostenible
 E cuestion di maneha turismo den forma mas sostenible ta algo cu den e ultimo añanan a haya hopi atencion y cu organisacionnan ambiental ta sigui boga p’e. Ta berdad cu Aruba su pilar mas grandi ta Turismo, y esaki probablemente no lo cambia pa awor. Sinembargo, loke si ta posible—y kisas mihor pa bienestar di comunidad—ta pa implementa medidanan sostenible pa por crea un balans den e sector di Turismo, uno cu ta promove Producto Aruba pero tambe sigura proteccion di nos naturalesa.

Den nan rapport yama ‘Aruba 2050: A Nature Inclusive Vision’, Aruba Conservation Foundation (ACF) y Wageningen University & Research (WUR), a mustra diferente manera pa incorpora medidanan sostenible.

Pa sector di Turismo, a trece algun medida, incluyendo turismo paden di e pais (Inland tourism). Diversifica turismo riba areanan mas paden di nos pais tambe por trece su beneficionan, specialmente pa localnan. Expandiendo turismo den areanan cu no ta costero por crea oportunidad di empleo pa localnan, trece entrada mas grandi pa negoshinan local y yuda preserva nos herencia cultural por medio di promocion. Tambe e ta kita e presion riba areanan costero popular y bida marino.

Tambe por limita temporalmente acceso na areanan den naturalesa. Reduci actividadnan turistico den ‘hotspots’ di biodiversidad durante cierto temporada di aña por ta importante pa yuda restaura y mantene e ecosistemanan existente riba Aruba. Pensa por ehemplo riba e temporada den cual nos shoco of ternchi ta reproduci, unda nan habitat y trankilidad ta esencial pa por reproduci exitosamente y sanamente.

Pa cu esaki por limita acceso na cierto areanan unda tin neishi of un ecosistema nobo. Limitacion riba actividadnan turistico den naturalesa manera tour di UTV tambe por mitiga disturbio den e areanan vulnerable aki.

Ta importante si pa provee suficiente educacion tocante e tipo di medida aki, ya cu por tin bishitante of localnan cu por ta desapunta pa no por experencia nos naturalesa completamente.