Temporada di campamento ta den ‘full swing’ y famianan ya a cuminsa pone nan tent y trailer pa por celebra Pasco di Resureccion cu un tradicion encanta pa varios generacion di Rubianonan. Dia 28 di maart, Cuerpo Policial a anuncia e comienso di temporada di campamento, registrando menos permiso y participacion. Sinembargo, e tradicion ta keda uno fuerte den comunidad, y e aña aki mas o menos 3.800 persona lo ta campando.

E tradicion di campamento

E aña aki, temporada di campamento ta cay entre 28 di maart y 12 di april, durante cual Rubianonan Catolico lo celebra Bierna Santo dia 3 di April y Pasco di Resureccion diadomingo 5 di april.

Aunke no por bisa cu certeza e origen exacto di e tradicion unico aki, varios relato ta sugeri cu famianan na Aruba tin mas cu 50 aña ta campa—algun reportahe sugeriendo cu e tradicion a nace ya prome cu Aruba su sector di turismo a bira un pilar economico.

Manera tur custumber, e tradicion di campamento a cuminsa den pueblo y di manera informal, unda famianan a cuminsa reuni riba beach of otro parti di e isla pa pasa den famia, gosando di otro su compania y disfrutando di un ambiente relahante durante Semana Santa. Pa hopi famia—y specialmente muchanan chikito—campamento ta un custumber hopi stima y ta keda bibo den e mesun famia pa generacionnan. De hecho, e tradicion ta asina fuerte den algun famia cu tur aña nan ta campa na e mesun luga pa decadas.

Ta mas popular pa campa canto di lama. Luganan manera Eagle Beach, Baby Beach, Santo Largo y Bushiri tur aña ta mira rijnan di tent y trailer poni banda di otro. Sinembargo, algun famia tambe ta campa den mondi of riba rif; na ranchonan cu ta keda den propietario di famia pa generacionnan.

Y tur famia tin nan mesun custumber—nan mesun manera con pa campa.

Pasco Grandi: Celebracion religioso y comercial

Pa Pasco Grandi diadomingo, ta custumber cu muchanan lo decora y/of busca webonan scondi den e area di campamento. Aunke buscamento di webo no ta un tradicion exactamente Arubano, e actividad aki ta sigui e tradicion global di “Easter”, unda muchanan ta cana rond cu basket pa colecta webonan scondi.

Aki na Aruba, buscamento di webo a bira un actividad casi nacional, unda ambos mucha y adulto ta busca webo rond e isla pa gana premionan grandi.

Pero celebracion di Pasco Grandi ta uno principalmente religioso, unda devotonan Catolico ta celebra e resureccion di Hesus tres dia despues di ser crucifica.

Algun famia ta participa na Caminda di Cruz di Alto Vista. Otronan sa bay misa 3or di atardi, of al menos ta duna un momento di silencio 3or diabierna atardi pa e morto di Hesus.

Y despues di dos siman di campamento, e temporada ta clausura y famianan ta warda tent pa e siguiente aña atrobe.

Temporada di campamento 2026: Menos participacion

Manera a menciona, Cuerpo Policial a registra menos participacion compara cu aña pasa. Segun KPA ta informa, a otorga 203 permiso unda lo tin mas o menos 3.800 hende campando riba nos isla. Compara cu aña 2025 esaki ta 13 permiso menos y 305 hende menos campando e aña aki.

No obstante, KPA ta keda hala atencion na e importancia di mantene na reglanan stipula. Manera a informa caba den un comunicado di prensa, polis a tene encuentronan informativo cu personanan cu a entrega peticion pa permiso. E campistanan aki tambe a ser informa di tur e regla y rekisito pa campa.

Cuerpo Policial ta enfatisa e importancia di mantene bo mes na e reglanan, tene respet pa bo ambiente y mantene e lugar limpi. Tambe ta importante pa tene consideracion pa otro famianan campando y no sea un molester cu zonido of comportamento inapropia. Ademas, corda pa tin bo permiso disponible ora polis controla durante siman.

Tambe mester menciona cu algun beach—specialmente Eagle Beach—tambe lo mira presencia di driekel. Di maart pa september, driekelnan lo subi canto di lama pa pone nan webo. Ta conoci cu e neishinan aki ta sumamente vulnerable, pues ta importante pa campistanan tene na cuenta cu mester mitiga daño y strobacion pa e turtuganan baby aki.

Fundacion Turtugaruba ta e organisacion cu ta cuida e neishinan di e driekielnan aki henter aña largo, y e trabao cu nan ta haci lo ta specialmente relevante e siman aki mirando e poblacion grandi cu lo tin riba beach.

E conocido driekel cu ta migra pa Aruba tur temporada (Leatherback Sea Turtle) ta pone 115 webo tur biaha cu e subi canto. Un driekel por subi canto 6 pa 8 biaha cada temporada pa traha neishi. A calcula cu apenas 1 den 1000 webo lo sobrevivi te madurez, y p’esey ta particularmente importante pa mantene distancia y minimisa strobacion den cercania di e neishinan.

Exceso den luz artificial tambe ta dañino pa e turtuganan aki. Ta conoci cu baby driekel ta usa e luz di luna pa guia nan pa awa. Sinembargo, luz artificial di hotel y tentnan por distrae e turtuganan aki y pon’e nan cana den direccion incorecto pa subi caminda.

P’esey e proteccion di e driekielnan aki, como tambe otro especie di turtuga na Aruba, ta keda un tarea importante pa e fundacion. Si ta mira turtuganan saliendo di nan neishi, sea consciente di bati alarma na e fundacion pa asina por percura un biahe sigur pa lama. Tambe ta pidi campistanan pa keda atento na e areanan vulnerable y si mira algun disturbio, tuma contacto cu e fundacion of polis.

Temporada di campamento sigur mester tin un ambiente agradable pa tur famia, pero tambe ta un momento pa recorda otro di e bunitesa di nos naturalesa y percura pa proteg’e.