E siman aki varios articulo ta mustra nos riba e importancia di tin bon ley pa controla fluho di placa di origen dudoso. Esaki no solamente pa nos cumpli cu e cuadro legal internacional dentro di cual nos mester opera, y cu cada dia ta bira mas elabora y estricto. Pero e mester yuda pa crea proteccion pa nos mes.

Djis imagina cu no tabatin henter e structura di control aki, y cu cualkier tipo di capital, sin restriccion, lo por a yega aki pa uza den cualkier tipo di inversion. Esaki lo a trece cu ne cu na cierto momento nos economia ta bay mas y mas bao di control di hende cu, siendo criminal, no tin ningun tipo di escrupulo tampoco den e manera cu nan ta opera como empresario. Ya cu tabata asina facil pa trece nan placa haya di mal manera aki, nan lo pensa cu pa opera como empresa tampoco mester cumpli. Caos y anarkia lo surgi, cu e hende local, como empleado y empresario chikito, como victima di tur esaki. Bon motibo anto pa nos tin ley y percura tambe pa cumpli cu nan.

E ehemplo bibo di con cos no mester bay, nos a caba di raporta den un articulo tocante situacion na Sint Maarten, unda gobierno ta yegando cerca di e momento cu e supervision riba fluho di placa di origen dudoso, internacionalmente organisa bao di Financial Action Task Force, un organo di control crea pa e paisnan mas prospero reuni den e organisacion pa desaroyo economico (OECD), cu ta haci tur esfuerso pa limita cu placa di nan economia ta ‘leak’ bay otro luga, manera na e conocido ‘tax havens’ cu ta trata di atrae placa a traves di tarifanan sumamente abao di impuesto riba ganashi. Ta bin acerca e peligro di labamento di placa cu crimen organisa a gana den e paisnan prospero aki, y e peligro grandi di financiamento di terorismo. Esakinan ta causante di un structura internacional di control riba transaccion financiero riba henter mundo.

Pais grandi o pais chikito, cumplimento cu e cuadro di supervision aki a bira algo normal, pa tur e actornan riba e tereno aki. Esaki no a conduci so na creacion obligatorio di entidadnan local di supervision, manera e MOT cerca nos pa supervisa transaccion inusual, pero tin efecto grandi riba e banconan comercial cu a haya nan cu hopi tarea di control y cumplimento, loke naturalmente mester paga di e benta di servicio financiero cu e banconan ta ofrece. Y como ciudadano, aunke talbes no regularmente, nos ta haya nos tambe cu e restriccionnan cu e control aki ta trece cu ne. No ta asina cu diariamente nos ta haya nos ta yena formulario, pero pa comercio el a bira algo di rutina, aunke e fastidia aki nunca lo custumbra cu ne. Pero enfin, no tin regreso pa pasado mas.

Pa loke ta nos region nos por mira den e ultimo decadanan tabatin un desaroyo particular, cu su banda positivo y negativo. Esey ta e surgimento di e regimen socialista Venezolano cu den e prome fase di e dictadura den cual el a converti gradualmente, a percura pa hopi capital di Venezolanonan cu tabata dispone di capital caba, a purba sali di e pais y establece nan mes na otro pais, tambe na nos isla. Pero, despues di esey, segun cu e Chavistanan a cuminsa ‘plunder’ nan propio pueblo, nos a cuminsa haya e delincuentenan aki, cu a logra cambia historia di e continente aki, den sentido negativo naturalmente, cu tambe tabata busca entrada aki. Den esaki e caso mas bochornoso tabata esun di Hugo Carvajal, cu tabata practicamente biba na Aruba, mientras cu agentenan di husticia Mericano tabata busca su paradero na henter mundo. Y, nos autoridadnan no tabata sa? Si pa Carvajal tabata asina facil pa ta gran parti di aña aki, cuanto mas di su categoria ta o tabata biba aki?

Esey tabata e pasado reciente, y awor, den e ultimo fase di e regimen aki, nos lo mester ta mas cuidadoso ainda, lo bo pensa… Pero no, ta te ora bin problema, anto gobierno ta realisa cu lo ta bon pa cuminsa ‘screen’. Y esey ta bon pa dos motibo atrobe. Uno, pa proteha nos mes di mas entrada di placa di origen dudoso, sigur si ta trata capital cu awor mester bin di Venezuela; y dos, pa nos no haya nos mes den problema cu nos partner mas grandi y importante, Estadonan Uni, cu na e momento aki ta tras di tur placa horta na Venezuela. Y den esaki, manera a sucede den e simannan cu a pasa, e screening haci pa gobierno mes, no ta bisa tur cos. Pakico no? Na prome luga, e conseho cu Servicio di Inteligencia duna ta netamente, un conseho. Gobierno por pone un banda y como ta trata di un conseho confidencial, nos no lo ni haya sa si berdaderamente esey tabata e conseho. Pa nos suerte tin un extra link cu no ta den man di gobierno. Esey ta e ‘due diligence’ di e banconan cu pa cuida nan mes, no por haci chansa den esaki. Djis corda riba e caso ‘Fly Aruba’ cu no por a drenta placa aki. Ey, e sistema a traha.

 

LEAVE A REPLY

Please enter your comment!
Please enter your name here