(CiberCuba) – E grupo empresarial BioCubaFarma a firma un acuerdo di cooperacion di biotecnologia y farmaceutico cu e municipio di Maricá, den e estado di Rio de Janeiro, Brasil, cu lo permiti e produccion conhunto di remedinan Cubano den e pais Suramericano.

Segun e Agencia oficial di noticia Cubano, e acuerdo a ser firma durante un reunion na La Habana entre autoridadnan Cubano y un delegacion Brasilero lidera pa Alcaldia di Maricá y su Instituto di Tecnologia y Innovacion. E acuerdo ta destina pa fortalece lasonan den e sector biofarmaceutico y habri rutanan nobo di exportacion pa tecnologia medico desaroya riba e isla.

BioCubaFarma a informa riba su cuenta di X cu e reunion a trata puntonan strategico manera: transferencia di tecnologia, proyectonan di investigacion conhunto, y e exportacion di productonan biofarmaceutico. Es decir, sin medicina of cuido decente pa su hendenan, e regimen ta priorisa pa yena e saco di su dictadornan cu fuentenan nobo di divisa.

Un di e aspectonan mas significante di e acuerdo ta e produccion na Brazil di remedinan manera Heberprot-P—usa den tratamento di ulcer di pia diabetico—y varios vacuna desaroya pa institucionnan Cubano.

E acuerdo a ser firma cu e Centro pa Ingenieria Genetico y Biotecnologia (CIGB) y e Instituto di Vacuna Finlay, y lo ser implementa pa medio di un empresa conhunto cu lo integra tecnologia Cubano cu infrastructura industrial di Brasil.

CIGB a describi e acuerdo como “historico” y a enfatisa cu e ta consolida e cooperacion Sur-Sur den salubridad publico, na un momento clave pa internacionalisacion di e sector di biotecnologia Cubano.

Maricá, un municipio di mas o menos 127 mil habitante, lo ta e centro di operacion pa e proyecto. E iniciativa ta parti di e interes di gobierno local di Brazil pa incorpora inovacionnan den salubridad publico, specialmente den su sistema municipal.

Paralelo cu e firmamento di e acuerdo cu Brazil, dia 28 di april, e gobierno Cubano a admiti pa prome biaha cu e lo mercadea productonan deriva di plasma di sanger duna pa su poblacion, den un iniciativa dirigi na atraa inversion directo di exterior pa sostene su sistema di cuido di salud maltrata.

Cu e iniciativanan aki, e gobierno Cubano ta busca pa rebiba su economia farmacuetico den exterior, hasta ora hospitalnan domestico ta enfrenta scarsedadnan extremo, boticanan cu no ta suministra suficiente, y un poblacion sin acceso garantisa na remedinan exporta.