(CiberCuba) – Gobierno Cubano ta bay construi dos edificio di dos piso na La Habana Vieja cu lo ta destina na e famianan cu ta victima di e explosion di Hotel Saratoga.

E edificionan di cuater apartamento ta bay ta situa na Vives 438, entre Carmen y Figuras y lo wordo entrega na esnan cu tabata biba na di Zuleta 512, pega cu e hotel, Agencia Cubana de Noticias a informa.

Ta premira cu e obranan, cu aworaki ta den fase di estudio di e suela, ta bay conclui dentro di 65 pa 70 dia. E construccion lo ta den man di e empresa Diseño Proyectos Ciudad Habana di Poder Popular.

Na e tereno unda ta bay ubica e apartamentonan tabata existi un edificio deteriora cu a wordo tira abao y e areanan na banda tabata fungi manera parkeerplaats.

E explosion di Saratoga a afecta mas o menos 23 edificio alrededor di e hotel di cual 17 tabata vivienda. Te aworaki a reporta 95 persona cu a keda afecta y di nan 78 a wordo evacua pa un hotel di e Villa Panamericana, aunke algun ta hospitalisa. E resto ta kedando na cas di familiarnan y di boluntarionan.

E explosion di dia 6 di mei a destrui no solamente e hotel historico, si no cu el afecta edificionan di vivienda cerca, un scol, un tempel bautista, e teatro Marti y e Capitolio, entre otro.

Un leak di gas mientras tabata tumando luga un operacion di cambio di gas ta e presunto causa di e explosion na e Hotel Saratoga na e centro historico di e capital Cubano.

Un total di 45 victima mortal ta e cifra cu e explosion a laga te aworaki, mientras cu 15 pashent ta sigui hospitalisa, seis ta den estado critico y dos grave.