Cuba tin 2.153 persona di mas di 100 aña

Cuba tin como 11,2 miyon habitante, di cual 2.153 tin mas di cien aña. Tres di nan tin entre 113 y 115 aña, segun dato oficial cu  a ser publica den corant na Cuba y  cu ta coresponde cu e prome tres luna di e aña aki. Di  e poblacion cu tin mas di 100 aña, mayoria di nan ta di sexo femenino, como 1200 persona, mientras cu pa loke ta e distribucion geografico, e mayoria di persona cu mas di 100 aña ta biba den provincia situa na oriente di Cuba, y na La Habana, e corant Juventud Rebelde a splica.
Asina e provincia capital tin 303 habitante cu mas di 100 aña, na provincia di Granma tin 249; Santiago de Cuba tin  245; y Holguín cu 190, segun  dato cu Ministerio Cubano di Salud Publica (Minsap) a publica.

Despues di provincia di Holguin ta continua e provincia di Villa Clara cu 183 persona cu mas di 100 aña, sigui di  Las Tunas (150), Camagüey (126), Guantánamo (118), Pinar del Río (109), Sancti Spíritus (107) y Matanza (102), Isla de la  Juventud (12), Artemisa (59), Mayabeque (59), Ciego di Ávila (60) y Cienfuegos (84). Un informacion cu a ser publica na luna di maart, pa medionan di comunicacion di Cuba a introduci e Cubana María Emilia Quesada Blanco, di 116 aña,  como e muhe mas bieu di Cuba,  y e ta di cuatro mas bieu di e mundo, pero no ta inclui den rapport internacional.

Alberto Fernández, dokter y hefe di Departamento di Adulto Mayor Asistencia Social y Salud Mental di ministerio (Minsap),  a bisa cu Cuba ta den e grupo di pais Mericano cu mayor indice di poblacion grandi, cu mas di 2,2 miyon di   persona cu tin  mas di  60 aña, un  20 % di e poblacion total. Fernandez a splica cu mas di 87% di Cubano ta biba mas di 60 aña, y el a sigura cu den proximo 10 aña,  un 90% di poblacion lo supera 60 aña.

“Nan ta un ehempel di envehecimento poblacional exitoso, pasobra nan ta sobreviviente y mayoria di nan a desaroya mecanismo cu a duna e posibilidad di haya e extremo di bida humano.  Investigacion cu a ser realisa ta mustra cu mayoria di nan no tin ningun problema mental, ni ta incapacita, o dependiente di otro persona den nan totalidad,” e funcionario a splica. E motibo di bida largo den poblacion Cubano ta e disminucion di fecundidad y mortalidad, hunto cu e garantia di acceso gratis  na  sistema di salud y hopi cobertura  den programa di seguridad social.

Fernández a bisa cu e hendenan aki ta un grupo di persona hopi vulnerable, p’esey gobierno ta duna un seguimento cada tres luna di nan salud, y esunnan cu ta den un situacion di salud critico ta haya un seguimento tur luna.

Bruki desechabel, matras special y rolstoel ta mayoria di articulo cu hende grandi di Cuba mester pa sobrevivi. Cuba tin planea pa cumpra pa aña 2017 hopi protesis pa orea. Na Cuba ta funciona 149 cas di hende grandi cu capacidad di 11.801 cama, 289 ‘cas di abuelo’ di atencion durante dia, cu capacidad pa 563 persona y 50 servicio di geriatria, caminda tin mas di 300 profesional di salud trahando.

“Dia pa dia e poblacion di hende grandi na Cuba ta aumenta, p’esey mester forma mas profesional den geriatria, na servicio di salud,” hefe di Departamento di Adulto Mayor, Asistencia Social y Salud Mental di ministerio (Minsap) a splica. Contrario na e situacion describi prome, Cuba a registra na aña 2016 como 116.872 nacemento, 8.192 nacemento menos cu na aña 2015.

Cuba a aproba leynan nobo pa aumenta e fecundacion di baby, pasobra e ta su “principal problema demografico.”

 

 

 

You May Also Like

Anker di television Colombiano a keda herida den masacre di Las Vegas

E hoben Colombiano  tabata di bishita na ciudad di Las Vegas- Merca, y e ...

Polis a detene ex-hefe di seguridad di Pinochet pa tortura

Coronel pensiona Cristian Labbé, ex-alcalde y ex-ministro di presidente y dictador di Chile Augusto ...

Condena mundial pa golpi di estado di Nicolas Maduro na Venezuela

Diferente gobierno di region a mustra nan preocupacion pa e situacion na Venezuela, cu ...

Guatemala: Descubrimento di un ciudad Maya completo den selva

Cu ayudo di un tecnica di cartografia aereo, un grupo di investigado a descubri cas, edificio, ...

Republica Dominicana: Cinco morto den accidente di bus

E informe di Defensa Civil di La Vega a informa di cinco morto den ...

Colombia: A ser emiti orden di captura contra hefenan di ELN

Fiscalia Colombiano a indica cu un hues a otorga orden di captura pa integrantenan ...