Minister di Finanzas, Asunto Economico y Sector Primario, Geoffrey Wever (Futuro) a entrega e Cuenta Anual 2023 di Pais Aruba na Algemene Rekenkamer. Entrega di e Cuenta Anual 2023 na Algemene Rekenkamer ta parti di e proceso legislativo pa responsabilisa entrada y gasto di Pais Aruba.
Algemene Rekenkamer ta encarga cu investigacion riba efectividad y legitimidad di entrada y gasto di Pais Aruba segun e Constitucion di Aruba. Durante nan investigacion riba legitimidad, Algemene Rekenkamer ta investiga si e cuentanan di entrada y gasto den 2023, ta contene tur post cu segun regla mester aparece den nan y/of si e cuentanan ta redacta conforme e proceduranan legal y ley di presupuesto. E proceduranan aki ta stipula den entre otro e ley di Contabilidad 1989 (Comptabiliteitsverordening V 1989) cu ta stipula e forma pa maneha y responsabilisa placa di Pais Aruba). Tambe Algemene Rekenkamer ta averigua si un decision di maneho a logra e obhetivo (eficacia) cu menos uso posibel di e recursonan (eficiencia) den 2023.
Como parti di e proceso legislativo pa responsabilisa entrada y gasto di Pais Aruba den 2023, Algemene Rekenkamer lo publica un rapport di e investigacion. Banda di duna conclusionnan riba efectividad y legitimidad di entrada y gasto di Pais Aruba, Algemene Rekenkamer ta haci recomendacionnan cu e meta pa mehora finanzas publico y reforsa e supervision financiero riba Pais Aruba. Cuenta Anual 2021 y 2022 a keda entrega riba respectivamente 15 di mei 2025 y 7 juli 2025 door di Minister Wever.
