Diadomingo pa 8:44 di mainta Central di Polis a keda notifica cu na St. Regis Hotel un persona lo mester a cay di balcon y no ta duna señal di bida. 

Central di Polis ta manda polis y como tambe ambulance na e sitio menciona. Na yegada di e unidad di polis en berdad nan ta topa un hende homber cu no ta duna señal di bida.

Personal di ambulance no por a haci nada mas pa cu e persona.

Recherche, polis tecnico, dokter forensico y departamento di slachtofferhulp a presente na e sitio di e sucedido.

Investigacion haci ta indica cu e victima a bula for di e piso mas halto di e hotel y asina a bin na fayece. Ta trata aki di un turista hende homber nacionalidad Mericano.

Despues, polis y personal di hotel a bay controla e camber di e victima y a bin encontra un dama cu tampoco ta duna señal di bida. Ta trata aki di e casa di e victima.

Un caso lamentabel y inusual y Cuerpo Policial Aruba y Bon Dia Aruba ta manda palabra di condolencia na famia di e fayecidonan.

Caso ta bao di investigacion di autoridadnan concerni y no tin mas detaye.

‘Fake News’ un siman prome

Algo cu a hala hopi atencion na momento cu e noticia a bira conoci, ta un incidente cu lo a sucede un siman prome, unda riba rednan social a circula un noticia cu supuestamente un turista Mericano lo a mata su casa den un camber di un hotel high rise. E tempo aya, Cuerpo Policial a desmenti e noticia, indicando cu ta trata di ‘fake news’.

“Relaciona cu un mensahe cu ta bayendo rond riba social media nos di Cuerpo Policial kier a informa lo siguiente: Diadomingo anochi a tuma nota cu tin un noticia cu ta circulando via WhatsApp. E mensahe ta bisa cu na un high rise hotel supuestamente un turista lo a mata su casa y lo a scond’e den cash’i paña.

“Cuerpo Policial a tuma pasonan mesora relaciona cu esaki. Polis a bay na e hotel y na unda a pone nan na altura di e noticia cu ta pasando via WhatsApp y a cuminsa cu un investigacion,” Cuerpo Policial a bisa dialuna di siman pasa den un comunicado di prensa. “E personal na e hotel a bisa cu no tin nada di crimen of mucho menos di locual ta wordo bisa riba e mensahe di WhatsApp. Ta di lamenta cu ta broadcast tipo di noticia negativo y cu no ta cuadra cu e berdad. Cuerpo Policial ta monitor tur informacion y ta tuma paso mesora pa por clarifica cu e noticia ta cuadra cu e berdad.”

Un siman despues, a bin haya e suceso di e turista cu su casa a ser haya morto den camber di hotel. Sinembargo, polis no a menciona ningun posible conexion entre e dos incidente.