Diadomingo pa 01:26 di marduga central di polis ta keda notifica di un candela na un cas na Madiki, y ta despacha patruya di polis y como tambe brandweer. Na yegada di patruya ta topa cu un cas candela.
Brandweer tambe ta yega na e sitio y ta cuminsa mesora na combati e candela.
Un rato despues ta bin compronde di esnan cu ta biba eynan y rond den vecindario, cu aparentemente tin un señora den cas ainda.
Brandweer a logra paga e candela y despues a bay controla den cas y a bin topa cu un curpa sin bida.
Di biaha a pone recherche, polis tecnico, Slachtofferhulp como tambe e dokter forensico na altura.
Den un comunicado di prensa, Cuerpo Policial a informa cu e victima ta un hende muher di nomber Clomene Pierre, naci na Haiti dia 6 juli 1960.
Papiando cu prensa local, famia di Pierre a indica cu apenas algun siman atras el a baha cu pensioen despues di a traha hopi aña den hotel. E familiar a indica tambe cu e no ta kere cu e candela tabata un accidente, ya cu esaki tabata e di dos biaha cu e apartamento di Sra. Pierre a pega na candela den marduga mientras cu e tabata drumi. Sinembargo, e comunicado di polis no a menciona si preliminarmente Brandweer a haya indicacion cu ta trata di un candela intencional.
Cuerpo Policial y Bon Dia Aruba ta manda palabra di condolencia na famia di e fayecido.
