Ayera mediante un comunicado di prensa, alto comisario di Cuerpo Policial di Aruba, Sr. Ramon Arnhem a reacciona riba un publicacion den un website di noticia local. Segun e comunicado, “hechonan den dicho publicacion a mustra di a wordo haci riba speculacion y sensacion.”

E articulo, publica riba un website di noticia local, tabata opinion di un redactor tocante e prestacion di alto comisario di polis y su trabao. Sinembargo, den e articulo a haci algun acusacion serio, sin cu a presenta ningun prueba.

Segun e relato, lo tabatin un entrada hudicial na cas di un agente di polis di fam D. y su casa, un ex-politico cu awo ta traha tambe den servicio publico. Durante e entrada hudicial aki, cu a tuma lugar na mei 2024, segun e relato lo a haya un operacion di preparacion di droga na cas di e polis. Pero segun e relato, na lugar di castiga D., a ‘recompens’e’ cu un posicion nobo na juni 2024.

Pero loke a hala hopi atencion di e relato aki ta e acusacionnan basa riba xenofobia y racismo. Gran parti di e articulo ta dedica na e nacionalidad di e personanan menciona, insinuando cu esaki tin algo di haci cu e posible actonan castigable cu lo a comete, of e tapamento di esakinan. Principalmente a critica alto comisario Arnhem pa ‘kita’ trabao di un ‘yiu di tera’. E comentarionan aki a crea hopi disgusto y consternacion, specialmente considerando cu Aruba ta un isla multicultural unda desde comienso hopi nacionalidad y cultura ta traha hunto pa prosperidad di nos pais.

Y mirando e seriedad di e acusacionnan, Cuerpo Policial a sinti nan mes obliga di duna un reaccion y aclaracion.

“Como alto comisario di Cuerpo Policial Aruba mi ta sinti mi obliga di reacciona riba e comunicado” di e noticiero, publica dia 30 di juni riba rednan social, “na unda mi integridad y di Cuerpo Policial Aruba ta wordo treci den duda,” alto comisario Arnhem ta bisa. “No solamente e noticia no ta cuadra cu e berdad, pero ta uno sugestivo y ta basa riba un analisis unilateral.”

E comunicado di polis ta continua bisando cu acusacionnan haci den e articulo, entre otro protege hechonan castigabel, sconde informacion y recompensa empleadonan basa riba comportacion no-etico, no tin base.

“Hechonan den dicho publicacion ta mustra di a wordo haci riba speculacion y sensacion,” Sr. Arnhem a bisa.

Cuerpo Policial a aclaria cu manera den tur caso cu tin señal di un posibel crimen ta haci un investigacion interno. Basa riba e investigacion a wordo dicidi y conclui cu no tabata tin mas motibo pa persigui. Tambe a pone e hechonan y e investigacion den un proces-verbaal y despues entrega na Ministerio Publico. E resultado no a wordo tuma lihe, pero ta un resultado di un proceso cauteloso y cu ta cumpli cu normanan legal y organisatorio.

Loke ta particularmente preocupante ta cu den e articulo ta hasta menciona hechonan cu no ta berdad di un fayecido, na unda ta sugeri cu informacion a wordo scondi. Sugerencianan asina no solamente ta robes pero tambe dañino y testigo di un gran falta di respet pa comparti informacion corecto, segun Cuerpo Policial.

“Loke ta hala mi atencion y ta toca mi personalmente, ta cu den e articulo ta referi na e hecho cu mi ta ocupa un funcion di un yiu di tera,” Sr. Arnhem ta bisa den e comunicado. “Mi descendencia ta wordo presenta como posibel motibo dicon mi lo actua den interes di cierto personanan. Insinuacionnan asina no ta solamente falso pero tambe discriminatorio. Nan ta aporta na un incriminacion di personanan a base di nan descendencia y ta trece desconfiansa den personanan cu no ta yiu di tera den posicionnan clave.”

“Mi ta enfatisa: ley ta igual pa tur hende” 

Ningun empleado den KPA, sin importa su origen, funcion, ta wordo protegi contra ley of privilegia den cuadro di estado di derecho, e comunicado ta enfatisa. Integridad no ta wordo determina door di lugar di nacemento, pero cu hechonan.

“Como hefe di polis mi ta respeta completamente libertad di prensa. Periodismo critico ta di hopi importancia pa un bon estado di derecho. Pero cu e libertad aki tambe ta bin cu su responsabilidad.

Informacion unilateral, analisis incompleto y trece supuesto hechonan cu no ta cuadra cu e berdad ta pone desconfiansa tanto den media como e publico.

“A pesar di e situacion aki, Cuerpo Policial Aruba ta keda para pa transparencia, integridad y semper recto.

Nos ta haci un yamada na e medianan pa den futuro sigui informa cu cautela, respetuoso y basa riba hechonan den interes di e sociedad (pueblo),” alto comisario Arnhem ta conclui.

Rectificacion
 Despues di e comunicado di Cuerpo Policial, e noticiero en cuestion a publica un rectificacion y aclaracion, unda ta bisa cu no tin prueba pa conecta e polis D. y su casa na cualkier actividad ilegal. Alabes ta admiti cu a cuestiona integridad di alto comisario Arnhem sin ningun evidencia y a retira nan insinuacion. Finalmente a pidi disculpa pa e manera cu a presenta e noticia.