Ayera tardi na Centro di Husticia Santa Cruz a tuma luga un conferencia di presan di caracter di urgencia pa trata e tema di asesniatonan cu a tuma luga den e ultimo dianan na Aruba. Presente na e conferencia tabata Procurador General di Ministerio Publico, Alto Comisiario di Polis y Vocero di Polis.
Manera ta conoci den e ultimo dianan, menos di un siman, dos asesinato a tuma luga na Aruba. “Nos por imagina cu e sucesonan aki tin un impacto grandi ariba e sensacion di seguridad di hopi ariba e isla”, Alto Comisiario di Polis a indica.
Alto Comisiario di Polis a extende palabranan di condolencia na famia, amistad y conocirnan di e victimanan di asesinato y na mesun momento a sigura cu Cuerpo Policial, hunto Ministerio Publico lo traha duro pa trece dilanti husticia e culpabelnan di e casonan lamentabel aki.
Dia 30 di november a tuma luga un tiroteo na districto di Savaneta na unda un hoben di 19 aña di edad a perde su bida. Relaciona cu e caso aki varios detencion a wordo haci. Apenas tres dia despues a tuma luga un otro tiroteo den e districto di Noord, zona turistico, na unda un homber di 31 aña di edad a perde su bida. Relaciona cu e caso aki un detencion a wordo haci.
Alto Comisario a indica cu investigacion ta andando pa ambos y no por a contesta preguntanan relaciona cu e casonan. Pero alaves a manda mensahe bisando cu Cuerpo Policial y Ministerio Publico lo reacciona adecuadamente ariba situacionnan grave y esey ta locual a pasa den ambos caso. El a remarca cu den ambos caso Cuerpo Policial a logra haci detencion den menos di un hora.
Pa evita casonan asina ki tuma luga, e Alto Comisario a splica cu prevencion lo un parti importante di e strategia di polis. El a menciona cu nan a reuni cu Minister di Husticia ariba e mesun topico aki y parti di e strategia ta vigilancia cu camara.
“Nos lo traha mas riba prevencion pa medio di vigiliancia cu camara den e diferente districtonan. E prome districto unda lo realiza esaki lo ta den e zona turistico na Noord y asina lo sigui torah na e diferente disctrcionan rond di e isla”, Alto Comisario di Polis a indica.
Otro strategia di prevencion ta e accionnan di entrega di arma. Procurador General a haci suplica na comunidad henter pa haci uso di e oportunidad di entrega di arma di candela y pa tambe acerca Cuerpo Policial of cualkier instancia pa evita cu problemanan por escala y termina den sucesonan lamentabel.
Te cu aworaki, e Prucrador General a menciona, cinco arma di candela y mas di 300 municion pa arma a wordo entrega durante e accion. Ultimo di e accion di entrega di arma lo ta 26 di december.
