HOH ta traha cu capacidad reduci desde juli, financiamento ta keda pega den negociacion y un limitacion mas grandi di cuido ta riba mesa
Hospital Dr. Horacio E. Oduber (HOH) ta trahando caba mas cu tres luna cu un capacidad reduci. Ainda no tin un decision tocante e financiamento cu ta necesario pa restablece e cuido regular, y mientrastanto tin e menasa di un limitacion mas grandi di e cuido. Esaki varios fuente den y rond di sector di salud na Aruba ta bisa. Nan no kier pa nan nomber sali publico, debi na e caracter delicado di e conversacionnan cu ta tumando lugar.
Menos capacidad desde juli
Desde cuminsamento di berano, tur dia un sala di operacion y un sala di endoscopia ta fuera di uso den hospital, segun varios fuente ta confirma. Tambe e capacidad di cuido intensivo a wordo reduci y e uso di personal externo a keda limita na un minimo. Den diagnostico urgente di laboratorio tin atraso pa motibo di falta di material. Na final di augustus e medidanan a wordo extendi te mitar di november.
Segun e fuentenan, e consecuencianan ta notabel caba: tempo di espera ta subiendo, intervencionnan planea ta wordo posponi of cancela, y mas pashent ta wordo manda exterior pa tratamento.
Tambe e entrega di material medico y medicamento ta bou di presion pa motibo di pagonan atrasa. Parlamentario Dangui Oduber (MEP) a trece dilanti publicamente caba na cuminsamento di september cu e situacion financiero di hospital tin consecuencia pa pago na proveedornan.
E medidanan den hospital
■ Tur dia un sala di operacion cera;
■ Tur dia un sala di endoscopia cera;
■ Menos capacidad di cuido intensivo;
■ Uso minimo di personal externo;
■ Atraso den diagnostico urgente di laboratorio;
■ Extendi te mitar di november.
Speransa di un solucion rapido
Na september un avance tabata parce cerca. Despues di consulta entre Stichting Ziekenverpleging Aruba (SZA), cu ta maneha hospital, y Uitvoeringsorgaan AZV (UO AZV), a expresa e expectativa cu riba corto plazo lo yega na un solucion comparti, cu lo permiti pa kita e reduccion di cuido completamente. Na mesun momento a pidi SZA pa presenta un proposicion mas detaya y fundamenta tocante e likides adicional necesario.
Den e periodo ey UO AZV a aumenta caba e pagonan periodico na hospital. E organo di ehecucion ta tuma e posicion cu decisionnan tocante financiamento adicional mester ta basa riba un proposicion bon fundamenta, cu ta mustra claramente e consecuencianan financiero y e consecuencianan pa e cuido.
Negociacionnan a stanca
No a sigui un decision. Segun personanan informa, e financiamento di e cuido actual awor ta conecta na un Memorandum of Understanding entre SZA y UO AZV, di cual e firma ta un condicion pa financiamento. Na cuminsamento di october e partidonan no a yega na acuerdo tocante su contenido. Ademas tin un procedura huridico coriendo entre SZA y Pais Aruba tocante cuido cu no a wordo paga.
Poco despues, directiva di hospital a anuncia cu riba un termino hopi corto lo mester limita e cuido regular mas ainda, si liquidez adicional no ta bin. Segun e fuentenan, esey por nifica cu hospital lo limita su mes na solamente cuido di emergencia. E situacion a wordo trece tambe na atencion di Inspectie Volksgezondheid Aruba.
Consecuencia pa pashent
Profesionalnan di cuido ta señala cu den hopi caso, posponemento di cuido no ta un tempo di espera neutral. Malesa por empeora, cu resultado cu pashentnan ta drenta despues cu keho mas pisa y via Servicio di Emergencia, cu un chens mas grandi di complicacion. Cu cancer, tempo ta hunga un rol directo den e tratamento. Un capacidad limita di endoscopia ta atrasa e investigacion di entre otro cancer di tripa. Menos capacidad di cuido intensivo ta haci operacionnan grandi mas dificil pa planea y ta aumenta e cantidad di pashent cu ta wordo manda exterior.
Un limitacion na solamente cuido di emergencia ademas lo nifica cu tambe tratamento cu ta urgente medicamente, pero cu formalmente no ta conta como emergencia, lo para.
Recursonan ta parce di ta presente
Notabel ta cu e impasse aki ta sosode mientras gobierno y UO AZV na cuminsamento di october a priminti publicamente cu hospital lo ricibi e sosten necesario pa sigui trata tur pashent sin limitacion di cuido, segun e fuentenan. Tambe ta proyecta pa e sector colectivo, esta Pais y e fondonan social hunto, un surplus di mas cu 200 miyon pa aña aki.
E preguntanan tocante causa, adelanto, compensacion y responsabilidad ta complica y ta exigi investigacion cuidadoso. Tocante esaki tin poco diferencia di opinion entre e partidonan involucra. Pero den sector di cuido e pregunta ta crece si e financiamento di e cuido cu ta wordo duna awor por wordo trata separadamente di e discusion ey, asina cu e investigacionnan por sigui nan curso sin cu pashentnan mester warda pa tratamento.
Un hospital, ningun alternativa
Aruba tin un solo hospital general. Si cuido no ta disponibel aya, e pashent ta keda cu warda of wordo manda exterior, loke ta tanto pa e pashent como pa AZV un paso pisa y costoso. Tur e partidonan involucra ta bisa cu nan ta persigui e mesun meta: reestablecemento di e capacidad completo di cuido.
Cu un limitacion adicional anuncia pa corto plaso y un reduccion cu formalmente ta dura te mitar di november, e espacio pa logra e meta ey via negociacionnan largo ta limita. Si Minister, UO AZV y SZA lo yega na un decision den e proximo dianan, lo determina con e cuido den hospital lo ta riba nos isla den e lunanan cu ta bin.
