Ta temporada di sargassum den Caribe y Ministerio di Salubridad, Medio Ambiente y Naturalesa (GMN) a cuminsa cu preparacion pa por start cu e proceso di limpia playanan cu yena cu sargassum.
Semper durante cierto temporada di aña, Corsou y paisnan den Caribe ta ricibi e asina yama “sargassum”. Sargassum ta un “zeewier” cu ta crece na abundancia den lama rondo di e isla di Bermuda y otro islanan den bisindario. Ora e sargassum los, e ta cuminsa drif riba lama y plama den lama Caribe. Cu otro palabra, semper tabatin y den futuro tambe lo tin sargassum den nos area.
Ultimo añanan e cantidad di sargassum a bira mas y mas un molester na diferente playa na parti nort west y tin biaha tambe zuid oost di Corsou. Boca Ascension y St. Jorisbaai ta dos playa cu mas tanto molester cada aña di nobo. Consecuentemente limpiesa di e dos playanan aki a bira parti di GMN su trabounan regular. Esaki ta tuma luga dos bes pa aña.
Asina cu GMN haña e prome alerta cerca Wardacosta of for di Boneiro, ta cuminsa monitoria e situacion di sargassum riba lama y tambe observacion di playanan. Ora tin indicacion cu e sargassum riba lama a baha, GMN ta cuminsa cu e parti di limpiesa na e dos playanan. Ta di sumo importancia pa limpia e sargassum, teniendo cuenta cu e naturalesa cu ta biba den e awanan aki. Por ehempel tin diferente turtuga cu gusta biba den e areanan aki y e presencia di sargassum por tin efecto negativo riba bida di e turtuganan. Tur aña, otro organisacionnan manera Sea Turtle Conservation Curaçao y Stichting Uniek Curaçao ta aporta na limpiesa di e dos playanan menciona y tambe otro playanan.
Actualmente tin hopi sargassum cu ta yegando tera na Corsou y tin mas na caminda. Por lo pronto, GMN ta sigui monitoria e situacion prome cu pasa na limpia e sitionan cu ta yena cu sargassum. E potretnan ta duna un bista di e situacion actual di sargassum na Corsou.
