E problematica creciente di cacho y pushi riba caya na Aruba ta yega na un punto di preocupacion nacional. Bon Dia Aruba a tuma contacto cu Jair Britten, cunukero y presidente di Comision Pro Cunukeronan Arubiano, ken a splica cu e efecto ya no ta un asunto local di molestia, sino un riesgo real pa cria di bestia, seguridad publico y mesun biodiversidad di Aruba.

Britten a splica cu e crisis no ta nada nobo. El a remarca cu e situacion actual ta resultado di aña tras di aña di abandono, falta di maneho structural y un ausencia completo di politica efectivo pa controla e poblacion di animalnan riba caya. Pa hopi tempo a ser adverti cu e poblacion descontrola di cacho y pushi a sali fo’i man. Un di e aspectonan cu, segun Britten, a contribui pa un aumento notabel ta e clausura di e ‘kill cage’, un luga destina pa pone animalnan indesea drumi di manera humano.

E cierre definitivo di esaki a duna paz den un ola di protesta, principalmente pa fundacionnan cu ta defende cacho y pushi. Pero, segun reportahenan di cunukeronan, e movemento aki tambe a habri e porta pa manipulacion y abuso. Britten a indica cu aña tras di aña, fundacionnan a sigui ricibi sponsor y donacion, hopi biaha di empresanan grandi den turismo y hospitalidad cu den hopi caso a surgi for di gruponan cu tin vinculonan cu casonan di fraude y manipulacion di tereno, y cu hasta a yega corte y haya sentencia.

Ademas el a agrega cu e ausencia di un centro pa control y eutanasia humano a crea un sistema unda sterilisa y rescata a converti den un negoshi lucrativo, mientras e cifra real di animalnan riba caya ta sigui crece. El a remarca cu e sistema falta regulacion y supervision, y e consecuencianan ta bira cada dia mas evidente.

Britten a enfatisa cu pa e cunukeronan, e problema ta diario. Bestianan ta converti den victima facil pa cachonan brabo cu ta circula den e area di cunucunan. E mescla di rasanan peligroso manera Pitbull, Boerboel, Rottweiler, Fila Brasilero y American Bulldog ta forma manada cu forsa pa mata bestianan grandi. El a indica cu luna pasa mes, dos buriconan den Parke Arikok a ser mata pa cachonan invasivo.

Britten a splica cu un criador di bestia ta un ‘herder’ y e mes ta zorg pa e cas, pa su bestianan ta sigur, pa cunucu ta cera etc. Ademas, el a indica cu tambe tin e arma di candela pa e herder (permiso duna door di polis), pero e proceso aki ta masha largo, complica y burocratico. Mayoria cunukero no tin acceso facil na esey, loke ta pone nan den un situacion fragil mientras nan ta traha pa preveni daño na nan bestia. Un otro metodo cu nan ta usa ta tene cachonan propio pa protege e cas, pero Britten a remarca cu un sobrepoblacion exagera di cacho y pushi, esaki ya no ta suficiente.

El a agrega cu e problema no ta limita na cachonan di caya. El a indica cu un cantidad grandi di cachonan domestico ta scapa for di nan doñonan sin ningun tipo di control.

Cunukeronan a presenta na gobierno un serie di recomendacionnan estrictamente orienta riba solucion durable. E prome paso, aunke impopular, ta e reapertura di e ‘kill kage’ pa reestablece un mecanismo humano y eficaz pa maneha animalnan cu no tin doño of cu ta presenta riesgo.

E comision tambe a propone cu tur fundacion y grupo cu ta traha cu cacho y pushi ser unifica den un solo organismo, un entidad centralisa y supervisa cu por controla maneho, fondo y responsabilidad. Den e modelo proponi, e boluntarionan tambe ta ser asigna exclusivamente na un fundacion unico pa preveni abuso y desorganisacion.

Otro recomendacion clave ta e introduccion di hondenbelasting (impuesto di cacho), usando modelo di Hulanda como ehempel. Britten a splica cu un impuesto estatal pa doñonan di cacho y pushi, gobierno por crea un fondo exclusivo pa maneho, control, microchip, inspeccion y operacion di sterilisacion.

Ademas di esaki, e propuestanan di e Comision Pro Cunukeronan Arubiano ta inclui microchip obligatorio pa tur mascota, limitacion estricto riba importacion di cacho y pushi, sterilisacion obligatorio pa tur animal domestico, cu excepcion pa criadornan registra, prohibicion di cria cacho y pushi den zona publico, pa preveni multiplicacion descontrola, y intervencion inmediato di control y shelter ora un animal sin doño of sin cadena ta ser mira den caminda publico.

Otro punto cu Britten a menciona ta un mecanismo mas agil y accesible pa cunukeronan por obtene permiso pa arma pa protege nan cria, cu regulacion y training apropia.

Aunke gran parti di enfoke ta riba seguridad y daño economico, e problema tin un otro dimension serio: e menasa ecologico. Britten a indica cu pushi y cacho di caya ta ser reconoci mundialmente como un di e depredadornan (un animal cu ta biba di gara y come otro animal) invasivo mas destructor riba planeta. El a trece dilanti cu segun datonan internacional, pushinan ta responsable pa extincion di mas cu 63 especie, incluyendo parha, reptil y mamifero. Nan ta mata sin necesidad y ainda ora nan tin hende ta alimenta nan, nan instinto ta pa sigui mata.

El a sigui splica cu riba islanan manera Aruba, caminda fauna nativo no ta evoluciona pa defende contra predadornan asina, e riesgo ta redobla. Britten a señala cu un solo manada por elimina un poblacion completo di lagadishi of otro especie cu tin un rol vital den ecosistema local. El a indica cu te awor e organisacionnan di naturalesa local no a duna un respuesta fuerte, a pesar di advertencianan di instancianan internacional di conservacion.

E situacion actual ta pone Aruba riba un rumbo fragil unda seguridad humano, seguridad di cunucu y balansa di naturalesa ta ser poni den peliger. Segun Britten, sin accion firme y un cambio drastico den politica, e situacion lo tin mas fayo. El a señala cu tur indicacion ta mustra cu sin un sistema centralisa, regula y respalda pa ley, e number di animalnan riba caya lo sigui aumenta y hopi mas daño lo sigui surgi.

Pa cunukeronan, e mensahe ta cla: Aruba mester trata e problema di cacho y pushi como un prioridad nacional. E isla no por permiti cu abandono, negligencia y manipulacion financiero ta sigui pone na riesgo un comunidad completo y un ecosistema fragil.