Segun informacion di Cuerpo Policial, dialuna mardruga 05.21 melding a drenta via CP cu un persona a wordo asesina na Jaburibari. Ora patrouille a yega na e sitio en berdad a constata un persona drumi ariba vloer cu no ta duna señal di bida. Departamento Forensico y Recherche Noord ta bezig na e sitio haciendo e investigacion. Dr Cime Texier a constata morto 07.00 y e curpa a wordo tuma den beslag door di fiscal Rammeloo. E persona asesina den e cas ta un hende homber nacionalidad Asiatico/Chines.
Un rato despues un persecushon a cuminsa na altura di McDonalds Palm Beach di un KIA Sportage numera V-966 cu na e momento di a wak patrouille pa un motibo of otro a pasa door di lus cora, treciendo bidanan di otronan na peliger y core bay nengando stopteken di polis y cu a termina na altura di Aruba Bank Hato caminda 5 persona a wordo deteni, 3 masculino y 2 femenino. Durante persecucion un di personanan den e auto a tira un gran cantidad di biljetenan for di auto y probablemente mas cos. Na unda e biljetenan a wordo tira ariba caminda un cantidad a wordo tuma den beslag. Investigashon lo determina si nan tin di haber cu e caso na Jaburibari. Segun polis, ta dificil pa determina kico ta causa di morto ainda, e autopsia lo determina esaki.
