(AFP)—Lider spiritual Buddhista, e Dalai Lama, a bisa dialuna cu e tabata gradicido pa su prome Grammy, despues di gana e premio den e categoria di buki di audio, naracion y contamento di storia.
E lider spiritual di 90 aña, ken ta biba den exilio na India, ta elogia mundialmente pa su campaña sin para pa autonomia mas grandi pa su tera natal Tibetano, cual Beijing ta bisa ta un parti integral di China.
A anunci’e como ganador na e ceremonia di Grammy na Los Angeles pa su buki “Meditations: The Reflections of His Holiness the Dalai Lama”.
“Mi ta ricibi e reconocemento aki cu gratitud y humildad,” el a bisa riba red social. “Mi no ta mir’e como algo personal, sino como un reconocemento di nos responsabilidad universal.”
Bisti den su tunica, sandalia simple y bril, e Dalai Lama no ta un celebridad usual. “Mi ta echt kere cu paz, compasion, cuido pa nos ambiente, y un comprendemento di e unidad di humanidad ta esencial pa bienestar colectivo di tur ocho biyon ser humano,” el a agrega.
E Dalai Lama tabatin apenas 23 aña di edad ora el a huy for di e capital Tibetano cu miedo pa su bida despues cu tropanan Chines a derota un rebeldia na 1959. E nunca a regresa. Beijing, cual ta condena e Dalai Lama como un rebelde y separatista, ta opone su victoria di Grammy, yamando su trabao “manipulacion politico anti-China.”
“Nos ta opone fuertemente e partidonan relevante usando premionan di arte como un herment pa manipulacion politico anti-China, y e posicion aki ta consistente y cla,” segun vocero di e ministerio di Asunto Exterior Lin Jian a conta durante un conferencia di prensa.
e Dalai Lama a insisti cu e tin hopi mas aña pa biba, pero Tibetanonan ta preparando a un futuro inevitable sin dje. Buddhistanan Tibetano ta kere cu e ta e di 14 reencarnacion di un lider spiritual naci pa prome biaha na aña 1391.
China a bisa aña pasa cu e mester aproba su sucesor. E Dalai Lama a bisa cu solamente su oficina basa na India tin e derecho aki.
