Home Local ‘Danki Aruba pa sostene nos artista internacional Jeon!’

‘Danki Aruba pa sostene nos artista internacional Jeon!’

539
Jeon

Diaranson anochi un publico grandi a presenta dilanti Bestuurskantoor pa duna Jeon un bon bini na e acto di reconocimento caminda gobierno di Aruba a nombra Jeon como Embahador di Bon Boluntad di nos pais. Un publico hopi grandi tabata presente na momento cu a Jeon y minister Xiomara Ruiz-Maduro a yega den limousine y manera cu e merece, un artista grandi, el a wordo ricibi riba red carpet. Minister presidente Evelyn Wever-Croes a presidi e comite di recepcion cu a duna Jeon un bon bini. Un cantidad di miembronan di prensa tabata presente pa cubri e yegada y henter e evento, canalnan di television y radio tabata en bibo for di Bestuurskantoor.

Jeon a saluda y saca potret cu e publico cu tabata warda cu yen di entusiasmo y alegria, tabata un momento hopi emocionante. Despues cu Jeon a saluda e publico presente, el a wordo dirigi na su asiento y e bunita evento a inicia cu interpretacion di Himno di Aruba pa e hoben Roseanne Croes, acompaña riba guitara pa meneer Rincones. Maestronan di ceremonia, Juelle Thode y Andrew Vrolijk a presenta en breve un biografia di Jonathan Bryan Jeon Thiel y despues a sigui un presentacion di video riba un pantaya gigante cu a wordo instala dilanti Bestuurskantoor.

Minister RuizMaduro a hiba un elocuente discurso den cual na inicio el a trece dilanti cu e no ta Anita, ni conoce Julissa, pero e ta Xiomara y el a bay busca Jeon na hotel den limousine pa trece Bestuurskantoor pa e ricibi e reconocimento y e esaki ta chikito compara cu locual Jeon merece. Palabranan bon scogi y emocionante a wordo encanta y aprecia pa e publico cu tabata bati man y expresa nan aceptacion grandi pa e frasenan scogi pa e mandatario encarga cu nos cultura.

Minister presidente a hiba palabra dunando reconocimento na Jeon pa su produccion Machika promoviendo nos pais Aruba internacionalmente, pa cual motibo gobierno di Aruba a nombra Jeon como Embahador di Bon Boluntad. Di parti gobierno Jeon a ricibi un bunita recuerdo.

Ademas Jeon a wordo obsekia un bunita holoshi di parti gobierno di Aruba. Minister Dangui Oduber, mandatario encarga cu Turismo tambe a hiba palabra y a gradici Jeon pa e promocion impagabel cu Aruba ta ricibiendo di Jeon pa medio di e produccion Machika. Despues di e reconocimento Jeon a hiba palabra y a expresa di ta hopi contento di ta bek na Aruba y a gradici e pueblo y gobierno di Aruba pa e reconocimento grandi aki. Jeon a motiva cada hoben cu si bo tin talento sigui traha riba dje y bo soño lo bira realidad. Jeon su discurso a manda un mensahe cu a cay bon den e publico: “Haci algo pa bo luga enbes di keda critica!”. Kiermen enbes di critica ban haci algo positivo pa nos pais. Na final Jeon a sorprende e invitadonan y e masa di publico cu su exitonan hunto cu e banda Upgrade Music y no por a keda afo e cancion y produccion Machika cu a hiba nos pais y papiamento internacional. Un espectaculo impresionante dunando un yiu di tera, un hoben cu talento un reconocimento cu e merece. Minister a Ruiz-Maduro ta yama Aruba danki pa a presencia e nochi na Bestuurskantoor. Den su palabranan e mandatario a expresa: “Nos a briya como pais ayera, den union nos a brinda un bunita homenahe na un hoben artista Arubano. Pabien Aruba, Pabien Jeon… nos a Machika.”