Minister di Labor mr.Wendrick Cicilia conhuntamente cu Departamento di Labor y Investigacion (DAO) ta anuncia cu a introduci salario minimo pa ora entrante 1 di januari 2026 pa asina kita e discrepancia entre e empleadonan cu ta traha 40 ora pa siman y e empleadonan cu ta traha mas cu 40 ora pa siman.

Entrante 1 di januari 2026 ta obligatorio cu tur empleado di 18 aña of mas, cu ta gana e salario minimo, gana por lo menos e salario minimo pa ora sin importa e cantidad di ora cu e ta traha pa dia, pa siman of pa luna. Entrante 1 di januari 2026 e salario minimo pa ora ta AWG. 11,58.

E cambionan entrante 1 januari 2026 ta:introduccion di un salario minimo pa ora di AWG. 11, 58 pa tur empleado desde 18 aña independiente di cuanto ora e ta traha y e funcion cu e ta eherce.

Tambe,a ahusta e factor cu ta usa pa e calculacion di un salario pa luna. E factor a bira awo, 4,333. Esaki ta nifica cu un empleado cu ta traha 40 ora pa siman y ricibi un salario minimo di AWG. 1986,20 pa luna, entrante 1 di januari 2026 lo mester ricibi un salario di AWG. 2007,50.

Ken tur mester duna atencion na e cambio di ley aki entrante 1 di januari 2026?
Pa controla si un empleado ta cay bou di e ley, e salario pa ora mester ta conoci. Si e salario ta mas abou cu e suma legalmente estableci di AWG. 11,58, mester ahusta e salario pa ora entrante 1 di januari 2026. Empleadonan cu ta gana un salario pa ora mas halto cu e salario minimo pa ora di AWG. 11,58 no ta cay bou di e ley aki. Tur empleado cu tin actualmente un salario mensual di AWG. 2257,93 of mas abou, mester haci uso di e formulanan akibou pa asina por determina si e cambio di ley aki ta aplicabel p’e.

Con ta calcula e salario minimo pa siman of pa luna?

Pa calcula e salario minimo pa siman lo usa e siguiente formula:

Salario pa siman=cantidad di oranan di trabou pa siman x salario minimo pa ora.

Pa calcula e salario minimo pa luna lo uza e siguiente formula:

Salario pa luna = cantidad di oranan di trabou pa siman x salario minimo pa ora x factor 4,333

Pa ricibi mas informacion riba e salario minimo pa ora cu a drenta na vigor 1 januari 2026, por haci uzo di e siguiente instrumentonan:

  • E link pa SUELDO app (DAO calculator salario minimo pa ora): https://daoaruba.com/index.php/sueldo/
  • Documento Frequently Asked Questions (FAQ) riba e salario minimo pa ora disponibel den diferente idioma riba e website di DAO: www.daoaruba.com.
  • Documento Frequently Asked Questions (FAQ) pa e grupo specifico di personal domestico riba e salario minimo pa ora disponibel den diferente idioma riba e website di DAO: www.daoaruba.com.
  • Por email na : dao.uurloon@gmail.comof por manda un WhatsApp:5936934 (solamente pa pregunta riba salario minimo pa ora).
  • Por yama na tel: 5237720 of por bishita oficina di DAO situa na Paardenbaaistraat 11 entre 7:30 am pa 12:00 pm y 1:00 pm pa 3:00 pm.