Daphne Lejuez di Accion21: ‘Un persona cu ta deteni realmente mester dicidi cu e no ta participa na un eleccion’

Señora Daphne Lejuez, candidata number 2 riba lista di e partido Accion21, tabata presente na centro di bario Playa Pabou pa deposita su voto pa eleccion di Aruba 2021 y ta en espera di un resultado positivo pa partido Accion21.

BDA: Con ta bayendo cu e dia awe y con e sentimentonan ta pa cu e resultado?

“E sentimentonan ta hopi positivo, cu nos lo bai logra haci un impacto”, señora Lejuez a bisa. “Pa locual ta nos participacion den e eleccion aki, y vooral locual nos a logra den 3 luna di tempo, mita kere nos por ta hopi satisfecho cu locual nos a logra”.

BDA: Mirando e acuerdo cu tin cu Hulanda, cua te puntonan cu tin prioridad cu señora Lejuez ta haya ta crucial pa un eventual coalicion?

“Landspakket ta un non-negotiable item definitivamente cu Hulanda, pero tambe pa cualkier coalicion cu forma”, señora Lejuez a bisa. “Mi ta kere locual ta nos reforma fiscal ta sumamente importante pasobra si no tin placa den caha ta lora nos no por haci nada. Mi ta kere eseynan definitivamente ta itemsnan cu ta hopi importante pa cualkier coalicion cu forma”.

BDA: Kico ta señora Lejuez su punto di bista, cu pa prome biaha den historia na Aruba, votadonan tin e opcion pa vota pa un candidato cu actualmente ta cera den prizon?

“Mi ta haya lamentabel cu na e momentonan aki nos no por a pasa un ley cu ta inclui parlamentario den e screening”, señora Lejuez a bisa. “Un persona cu ta deteni realmente mester tene honor na su mes y dicidi cu e no ta participa na un eleccion pasobra e no ta bunita ni pa su partido, ni pa su mes, ni pa nos pueblo tampoco, e ta duna un señal robes”.

BDA: Si Accion21 tin e oportunidad di goberna den coalicion, tin algun partido cu definitivamente no lo por uni cune?

“Mi ta kere un bes cu e resultado drenta anto e ora ey nos por bay defini cu ken y con nos lo bay traha. As long cu tur hende ta pone Aruba prome, nos kier traha abiertamente cu cualkier partido cu tin esey como meta principal, bienestar general y nos isla na prome luga”, señora Lejuez a bisa.

BDA: Cu señora Lejuez su experencia, kiko ta e cambionan cu señora Lejuez ta mira cu por wordo hasi?

“Mi ta hopi contento cu mi tabatin e oportunidad di sirbi mi pais caba pa casi 4 aña y cu mi por a detecta camindanan, specificamente den nos leynan, den procesonan cu por bin cambio pa facilita, pa hacie hopi mas miho y mas facil pa nos por trece e cambionan necesario”, señora Lejuez a bisa.