Dashboard financiero crea pa ciudadano ta pone enfasis riba importancia di hermentnan accesible pa pueblo

Ora cu finanzas di gobierno no ta cuadra of un proyecto priminti no ta cuminsa cana, algun di nos ta asumi inmediatamente cu esaki ta nifica cu e oficialnan ta hortando e placa.

E ta un sospecha cu ta plama rapidamente riba rednan social y den combersacion diario, y uno cu un usuario riba Facebook, Giersi, a purba atende directamente cu data cu por mira y verifica.

Den un publicacion riba Facebook, Giersi a anuncia un dashboard financiero nobo cu ta cubri henter aña 2025 y cu por haya riba pueblodiaruba.com/dashboard.

E herment aki ta laga cualkier persona tin acceso na y mira con hopi entrada gobierno di Aruba a genera, con hopi el a gasta y di unda e placa aki a bin. Manera e publicacion ta describi, “mayoria hende ta kere cu gobierno ta haya placa benta abou of nan tin un mata cu nan ta ranca e placa,” mientras cu en realidad, Giersi ta argumenta, e problema ta cu tiki hende ta bay y mira e cifranan cu ya caba ta publico.

Esaki ta e punto central riba cual mester presta atencion y e motibo dicon e dashboard aki ta merece mas atencion cu loke nos por pensa.

Transparencia financiero no ta un concepto nobo den administracion publico, pero hopi biaha ta trata esaki como algo burocratico y no como un herment civil cu semper ta den nos man.

Aruba su presupuesto gubernamental, su rapportnan di ehecucion, y varios cifra for di Banco Central ya caba ta publico. Nan ta publica riba website oficial di tanto gobierno como Banco Central mes, manera e propio publicacion ta enfatisa. E informacion ta existi y ta accesible pa nos tur caba, loke ta falta ta un version cu un residente ordinario por nabega sin mester di experiencia den finanzas publico of oranan disponible pa lesa varios documento.

Esaki ta un patronchi cu ta mira mas aleu cu Aruba. Investigacion riba transparencia financiero publico consistentemente ta haya cu e balor di data publico di gobierno ta depende menos riba si e ta publica un caminda, y mas riba si esaki ta publica riba un plataforma di manera util. Reportahe na tempo, berdadero y comprensivo ta necesario, pero esaki ta haya su importancia solamente ora cu ciudadanonan ordinario y no solamente reporteronan, auditornan of politiconan den oposicion por interactua cune. Ora cu e buraco den acceso aki ta existi, speculacion ta yena e bashi y hende no ta stop di puntra unda e placa a bay, sino cu nan ta cuminsa confia den rumor.

Esaki ta precisamente e dinamica cu Giersi ta splica, un publico cu, den ausencia di un herment accesible, ta asumi lo pio na luga di examina kico e cifranan oficial realmente ta demostra.

Ta facil pa mira gobierno como algo tecnico cu ta pertenece na economistanan of ambtenaarnan so. Sinembargo un presupuesto nacional ta practicamente un recurso comparti. Turismo, impuesto, importacion y otro entrada publico ta financia e hospital, scol, caya y servicionan riba cual residentenan ta depende tur dia. Ora cu e gastonan aki no ta transparente, varios consecuencia real ta sigui.

Responsabilidad ta debilita

Si ningun hende fuera di gobierno por verifica con ta aloca finanzas, oficialnan ta enfrenta menos presion pa hustifica nan decision of coregi esnan menos bon.

Corupcion ta bira mas dificil pa detecta pero mas facil pa acusa falsamente

Falta di transparencia ta afecta ambos banda. E por sconde mal maneho, pero tambe e por laga acusacionnan plama sin habilidad di por desmenti of verifica esakinan, pa motibo cu no tin un base accesible di cifranan real cu por usa den contra di nan.

Giersi su publicacion ta captura e tension aki di un manera casi perfecto, ilustrando cu hopi biaha tin sospecha di mal maneho no necesariamente pa motibo cu tin prueba di esaki, sino pa motibo cu no tin un manera facil pa comproba lo contrario tampoco.

Confiansa publico ta cuminsa baha

Na momento cu un comunidad dicidi cu finanzas publico ta practicamente un secreto, duda ta cuminsa drenta otro areanan di bida civil manera votacion, participacion den consulta publico, y confiansa general den institucionnan.

Mal decisionnan ta keda sin coreccion

Presupuestonan sin critica ta presupuestonan cu ningun hende por mehora. Compara e plan cu gastonan real, evalua e uso di un surplus, evalua si financiamento di un programa ta relativo na su meta, tur ta cosnan cu por atende solamente ora tin un hende supervisando y controlando tur cos.

E balor specifico di e dashboard aki no ta den brinda informacion nobo, mirando cu e dashboard ta usa data cu ta disponible publicamente riba website di gobierno y Banco Central. Su balor ta den e traduccion y accesibilidad.

Un dashboard financiero ta haci trabao cu un cantidad di rapport or cuenta anual no por haci cu facilidad.

Na prome luga, e ta agrega cifranan cu por ta plama, manera entrada, gasto y nan categorianan respectivo den un solo luga, kitando e peso di referencia y compara diferente fuente of plataforma pa contesta un solo pregunta.

Di dos, e ta visualisa e data, convertiendo cifranan y informacion den patronchinan cu por reconoce na simpel bista.

Por ultimo, y posiblemente e parti mas importante, e ta baha e nivel na uno civil. Manera por a nota, e ta keda un dashboard relativamente simpel y no ta separa gastonan den categorianan specifico manera biahe, entretenimento of gasto personal conecta na oficialnan specifico. Sinembargo te hasta den su forma actual, e ta hala e combersacion publico for di “mi a tende cu gobierno ta desperdicia placa” y hib’e den direccion di “esaki ta loke gobierno a reporta y esaki ta con bo por wak pa bo mes.”

Giersi a argumenta tambe cu esaki mester ta un recurso bibo y no algo cu ta publica un solo biaha. E ta haci mencion cu un gobierno responsable mester mantene un dashboard cu actualisacion continuo, pa asina publico tin un sentido actual y andando di kico ta sucediendo cu economia di Aruba y no djis un bista historico.

E dashboard ta keda un trabao continuo, cu comentarionan riba su publicacion treciendo dilanti algun parti cu por mehora, partinan cu na e momento ey no tabata cuadra of aclaracionnan cu ta mehora e comprension di e informacion disponible.

Esaki ta mustra cu aunke a pone e herment den nos man, haci uso di esaki ta algo cu ta keda na nos mes. Na final di dia, nos no por keda tuma informacion y digeri esaki manera e ta presenta, sino cu nos tin cu haci nos parti di e trabao den lesa, analisa y compronde e informacion cu ta den nos man, awo na un manera mas accesible y simpel, pero den nos man toch.

Ningun dashboard crea di manera independiente ta un susbstituto completo pa hermentnan di transparencia oficial y publica pa gobierno. Manera Giersi mes a nota, e mester ta un punto di comienso pa interaccion publico y trece accion gubernamental den e direccion aki. Su informacion ta depende riba con e creador ta dicidi di refleha e data di gobierno y Banco Central, pues cada persona mester verifica e informacion di manera independiente.

Toch, cosnan manera esaki ta sumamente importante pa motibo cu nan ta cera e distancia entre data publico y comprension publico. Finanzas di gobierno di Aruba no ta un secreto, pero si nan ta algo cu no ta usa pa esnan na ken e ta pertenece. Sea cu e dashboard aki en particular bira uno duradero of no den combersacion civil di Aruba, e impulso tras di esaki, cual ta pusha residentenan ordinario den direccion di e fuente primario na luga di e rumor, ta exactamente e tipo di habito cu ta fortalece transparencia, y si haci esaki na nivel gubernamental, esaki lo keda reforsa mas ainda.