Datonan di Encuesta Nacional di Salud 2016 lo determina maneho specifico pa cierto grupo di nos poblacion

Eugene Maduro encuesta salud Br 1.JPG
– For di awe y te cu 12 di december ta tuma luga un Encuesta Nacional di Salud 2016 (GOA),  organisa pa Directie Volksgezondheid (DVG), cu ayudo logistico di Oficina di Estadistica di Aruba (CBS).  Considerando cu salud ta lo mas importante cu nos tin, pues e encuesta aki ta hopi importante, ya cu e ta bay duna un indicacion di e condicion di salud di  nos poblacion.
 
A wordo tuma 1% di e poblacion di Aruba cu ta alrededor di 1105 persona cu lo wordo encuesta.  Un grupo di 17 encuestado hunto lo bishita mil adres reparti den 7 zona rond Aruba. Ta asina cu cada encuestado lo haya 65 adres pa bishita.  
 
Encuesta 
Sr. Eugene Maduro di departamento di Epidemiologia di DVG a splica na Bon Dia Aruba cu na e adres concerni e encuestado lo yega;  y a base di un metodo di seleccion e persona den e adres lo wordo selecta pa participa den e encuesta aki.  E ta henter e poblacion di 0 pa 100 aña, y e unico rekisito ta cu e persona encuesta mester tin minimo un aña biba na Aruba.  E ta un encuesta anonimo, ya cu e nomber di e persona no ta wordo poni den encuesta.
 
E preguntanan tin di haber encuanto salud den general, estilo di bida,  consumo medico, salud mental, salud dental, salud sexual y reproductivo. Tambe tin un capitulo specifico pa hende  homber y hende muhe. Den total –segun Sr. Maduro- e encuesta tin 8 modulo pa un total di 100 pa 120 pregunta. 
 
E meta tras di e encuesta aki ta pa Departamento di Salud Publico (DESPA/DVG) por haya datonan  nobo tocante e salud den general di e poblacion di Aruba; y compara esaki cu e datonan cu nan tin di encuestanan anterior. Esaki ta e di tres  encuesta di salud riba nivel nacional cu ta wordo haci den persona entre 0 pa 100 aña. Un par di aña a wordo haci un encuesta di salud pero specificamente den e grupo di edad di 25 pa 64 aña. 
 
 “Asina bo ta haci un comparacion wak si e salud a mehora, of a keda mescos of a deteriora”, el a bisa.  Cu e resultado di encuesta aki lo por bin maneho specifico pa cierto  grupo di nos poblacion , y tambe e areanan cu mester wordo mehora e servicio medico na Aruba. 
 
Chekeo medico
Di e grupo aki atrobe otro sub grupo lo wordo selecta pa participa den un chekeo medico. Nan ta calcula cu lo ta un grupo di 350 persona cu aparte cu lo wordo encuesta lo haya e posibilidad di un control medico general cu ta inclui diferente test.  E chekeo aki lo tuma luga den dos centro medico,  un na IMSA San Nicolas y otro na DESPA mes entre 7or te cu 9or di mainta. 
 
E persona cu ta wordo selecta pa e chekeo medico, mester bin na yuna, nan mester duna autorisacion pa saca sanger, na mester bin cu orina. Tambe nan lo wordo midi, pisa y nan djente   ta wordo gecheck. Na final nan lo haya un carta pa nan doño di  trabou cu ta indica cu nan a participa den e chekeo medico. 
 
Ora di haci e chekeo medico aki, si e persona selecciona ta autorisa,  su informacion ta wordo manda pa su Dokter di Cas. Si e ta opta pa no hacie, e ora su  informacion ta keda completamente anonimo.
 
Sr. Maduro a haci un yamado na e poblacion di Aruba pa contribui cu e encuesta aki y cu e persona cu ta bay encuesta bo lo ta plenamente identifica. “Pa coopera cu e investigacion aki pasobra asina Aruba henter lo beneficia di e datonan cu departamento di Salud Publico lo haya”, el a bisa.  El a recorda e lema di nan encuesta: Participa pa nos bienestar.
 
Cada encuestado 
Director di Departamento di Salud Publico, Drs. Jerry Staring ta pidi atencion pa e encuesta y ta splica con por reconoce e encuestado. E encuestadonan no lo cana di cas pa cas, pero tin un lista di adresnan specifico cu a scoge basa riba informacion cientifico di  estadistico. Cada encuestado tin un badge, un tablet y e lista di pregunta. Nan a haya training for di CBS,  ya cu e encuestadonan ta trahado di Gobierno y tambe tin persona particular. 
 
Riba e badge tin informacion specifico: un potret y e nomber di e encuestado, e logo di DVG, e logo di e encuesta (G.O.A) y patras di e badge tin e firma di e director di Departamento di Salud Publico. Drs. Jerry Staring ta subraya cu e encuesta ta uno basta extenso y ta tuma un poco tempo pa pasa riba dje. Si un famia wordo acerca y ta desea di confirma prome cu DVG si di berdad su adres ta riba e lista y e persona cu a acerc’e na su cas ta un encuestado pa DVG, por yama DVG libremente durante di orario di trabou, esta di 7:30 am pa 4:30 pm, di dialuna pa diabierna.
 
E encuestado ta disponibel pa bishita e adresnan despues di oranan di trabou y lo por “schedule” e bishita basa riba e orario cu ta cumbini e persona(nan) cu ta biba na e adres. Si acaso e famia of persona no por participa of no ta desea di participa na e encuesta, si nan informa e encuestado y na su turno e encuestado lo bishita un adres adicional di un lista alternativo cu e ta haya di DVG.
 
E encuestado no ta e persona cu ta determina ki adres e ta bay bishita y tampoco no ta bay di cas pa cas, pero ta bay na adresnan specifico. A scoge e encuestadonan basa riba criterio estricto  y nan no por divulga ningun informacion obtene durante di e encuesta. E encuesta ta completamente anonimo, kiermen no por conecta e informacion na un persona specifico. Departamento di Salud Publico di Aurba (DVG) y e encuestadonan ta gradici di antemano tur persona y famia pa nan cooperacion y participacion na e Encuesta Nacional di Salud 2016.

You May Also Like

AHATA ofreciendo premio pa campamento responsabel

ORANJESTAD – Temporada di campamento un biaha mas ta den porta. E aña aki ...

IMG_0793.JPG

Caso di maltrato a termina cu detencion pariba di Community pool

Diasabra anochi patruya di San Nicolas a presenta na Otaheitistraat altura di Community Pool ...

‘Importacion di carni for di Colombia mas barata’

Durante su bishita na Colombia, minister, Chris Romero a logra reuni cu diferente institucion ...

‘Mester caba cu violencia contra hende muhe’

Recientemente Fundacion pa Hende Muhe den Dificultad (FHMD) a ricibi un tremendo acogida, y ...

Importancia inpeccion ekipo pisa 2.JPG

Mayoria di accidente relaciona cu operacion di grua ta fatal y costoso

– Pa preveni y disminui e risiconan y peligernan na pia di trabou, DTI ...

Operacion calamidad di derame azeta a baha di intensivo pa pasivo

Rampenbureau ta informa Bon Dia cu operacion di haci limpiesa na costanan relaciona cu ...