Pa segundo biaha den su carera, David Guetta a keda nombra como DJ #1 di mundo. E artista Frances di 53 aña a lidera e encuesta Top 100 DJ di DJ Mag, cual ya el a gana na 2011. El a ricibi e premio durante un show virtual AMF Presents Top 100 DJs, cual a tuma luga na Amsterdam y a keda transmiti mundialmente.
Despues di gradici e premio, Guetta a bisa algun palabra emotivo den cual el a repasa e comienso di su carera. “Ta emocionante pa pensa cu 40 aña pasa mi a toca pa prome biaha na un club y cu nuebe aña a pasa desde cu mi a gana e premio aki na 2011. Ora mi a gana pa prome biaha mi a haya odio pa mix musica dance cu pop y mainstream”, el a recorda. “Pa mira atras y wak con esaki a modela e industria y hacie evoluciona ta resulta hopi loco. Pa gana despues cu mi a bolbe na loke mi tabata haci originalmente y lansa mas musica underground cu mi amigo MORTEN y Future Rave, y cu Jack Back, ta hacie mas special ainda.”
Ademas el a indica cu e ta debe su exito na su fanaticonan. “No ta importa kico futuro lo trece mi lo t’ey, cla pa haci e banda di zonido na fiesta, y mi ta spera cu boso tambe”, el a agrega, ilusionando su siguidonan na henter mundo y cu speransa pa bolbe toca den un evento cu publico presente.
A pesar di e paro na nivel mundial pa pandemia di coronavirus, e fanaticonan di musica dance a vota for di nan cas pa nan DJ faborito den e encuesta di 2020 di Top 100 Djs: casi un miyon y mey persona a vota.
