Manera ta conoci recientemente candidato pa minister parlamentario Mike de Meza y su ekipo di abogado a ser informa cu director di DIMP a entrega un keho formal den su contra. De Meza su ekipo a pidi informacion tocante kico ta e acusacionnan cu tin contra e parlamentario, pero como cu no a ricibi respuesta nan a entama un caso contra OM.

E proceso di candidatura pa minister di parlamentario Mike de Meza tin varios luna andando y awor esaki lo ser para atrobe cu e posibilidad di alarga ainda mas pa motibo cu Ministerio Publico (OM), segun De Meza y su abogado a declara diadomingo ultimo, a ricibi un keho oficial di parti di DIMP, locual ta nifica cu OM mester haci un investigacion penal.

Diadomingo ultimo, despues di yega for di Hulanda, De Meza y su ekipo legal a duna un declaracion na medionan di comunicacion den cual ta indica cu nan a ser informa tocante e keho cu a ser entrega, pero no ta na altura di kico en realidad ta e acusacionnan cu tin contra e parlamentario.

Segun e noticiero local, Noticia Cla, a raporta, abogado di De Meza, Desiree Croes a confirma na e portal cu nan a pidi informacion na OM tocante e acusacionnan y a hasta duna un deadline pa ricibi contesta for di OM, pero como cu no a haya reaccion nan a tuma e decision pa entrega un caso contra OM.

E decision aki ta pa purba forsa OM, cu intervencion di un hues, pa duna De Meza y su ekipo informacion tocante e acusacionnan y kico ta e sospechonan cu tin contra e parlamentario. Ley di ‘Strafvordering’ ta papia solamente di un periodo “rasonable” (redelijk) di tempo, dus den e caso aki, abogado di De Meza lo mester argumenta cu e ta di opinion cu e tempo rasonable a pasa caba.

Apenas luna pasa, De Meza ya tabata den corte, den un caso cu el a entama contra DIMP, relaciona cu e entrega di un declaracion di comportacion fiscal cu e parlamentario tabatin mester pa su proceso di screening pa bira minister.

Den su veredicto hues a dicta cu e no por interveni y no por duna De Meza locual el a pidi y a bisa cu e decision ta den man di prome minister/ formador Mike Eman. Den su declaracion despues di e veredicto prome minister Eman a indica cu e tabata cla pa tuma e siguiente paso, cual tabata pa sinta cu De Meza y SE Gobernador di Aruba.

E momento ey De Meza no tabata na Aruba y pues mester a warda e yega Aruba back pa continua cu e proceso, pero awor tur cos ta para atrobe.

No ta conoci ainda kico ta e acusacionnan cu tin contra De Meza. Dialuna ultimo Bon Dia Aruba a tuma contacto cu vocero di Ministerio Publico y tambe pers chef di Gabinete AVP-FUTURO pa puntra tocante e keho aki y e acusacionnan, pero ambos partido a contesta cu no lo duna comentario.

Tambe a purba tuma contacto cu parlamentario De Meza y a puntra e parlamentario si nan tin informacion tocante kico ta trata e keho cu DIMP a entrega na OM, si nan a informa su persona kico ta e acusacionnan cu nan tin contra di dje, con esaki ta afecta su candidatura como minister y si su relacion cu AVP ta afecta, pero no a haya contesta.