Debate obstaculisa y sabotia

Diahuebs anochi Aruba por tabata testigo di un berguensa, ora cu e partido actualmente den gobierno no solamente a invadi e audiencia, pero a obstaculisa y sabotia e anochi di forma intolerabel. Prome cu pauze e disturbio tabata ainda na nivel manehabel, pero den e segundo parti cos a bay completamente for di man. Ta mustra facil pa busca e culpabel entre Camara di Comercio como organisado, o e siguridad di e hotel, cu na cierto momento a hala atras y a laga tur hende haci y deshaci. Esaki a causa un situacion hopi fastioso pa e demas lidernan, cu no a haya oportunidad pa papia den un ambiente debido.

Lamentablemente e lider di e partido na luga di uza su autoridad moral pa urgi su fanaticada pa mantene respet, tabata parce di ta gosa di e tumulto, cu na final di e anochi a yega na nivel simplemente bochornoso. Un falta di respet total pa e organisacion, pa demas participantenan y pa publico  en general. Di e manera aki nos mester celebra democracia? Den circunstancia claramente pa mustra tur hende cu ta nos ta manda? Aparentemente e partido responsabel pa e bochorno aki no a corda cu a invita nan pa un celebracion di un debate fuerte, pero civilisa, unda hende a paga bon placa pa bin scucha e partidonan na palabra, no pa scucha bochincha di fanatico.

Nos a comprende cu Camara di Comercio a planifica un rueda di prensa pa otro siman pa duna nan punto di bista riba e sucedido. Esey no ta solamente un bon idea, pero ta parce nos un necesidad grandi den e transcurso di e simannan cu ta resta nos pa yega na e fecha di eleccion. Nos no mester un situacion den campaña unda emocion ta cuminsa tuma rienda, loke por hiba nos na cos lamentabel.

Tur esaki a kita atencion for di e aspecto di contenido di e anochi, e motibo real pa e publico ta presente, y pa miles di ciudadano sigui e debate na cas o otro caminda.  Mester bisa cu KvK a haci un bon esfuerso pa haci e debate mas dinamico y mas interesante, den cual nan a logra parcialmente. E formula di invita mas candidato di cada partido tabata bon idea, pero e escogencia pa laga e partidonan formula pregunta, sin reformula y drecha nan, a hiba na varios momento di confusion tocante e contenido di e pregunta. Esey merece mehoracion. Keto bay ta insisti e afan cerca varios pa no contesta e pregunta, pero pa cuminsa un storia full di nan mes. Esey ta keda e libertad di cada un, pero no ta yuda na e meta di e anochi, esta duna claridad na e ciudadano kico e partido ta pensa. E borchinan di pro y contra a yuda pa obliga e partidonan di scoge un posicion, pero den e splicacion despues di esaki no tur a satisface. Na e prome tema caba lider di AVP a desvia completamente, pa referi na e cuentanan anual cu awor si ta keda cla, pa tur hende mira unda nan placa ta keda. Nice try, pero tabata papia di corupcion, cu bo no por haya den jaarrekening… Ni un palabra con gobierno tin pensa di mehora control den e departamentonan actualmente den crisis di integridad y credibilidad.

E tema di e debe fiscal tampoco a logra di yega na tanto idea util cu por yuda den reduci debe. Mientras cu e partido den gobierno ta haya hustifica pa no baha gasto, e contrincantenan principal MEP y POR ambos a duna di conoce cu mester baha gasto, banda di laga economia crece, loke tambe ta e meta di e adversario gobernante. Encuanto edad di pension por a constata cu tabatin un mayoria pro baha edad di pension y/o introduci un areglo flex cu ta permiti un persona bay cu pension mas tempran o mas laat. E defensa riba e punto aki di banda di e partido gobernante y su lider tabata talbes e momento mas fuerte den su presentacion den henter e anochi. Riba otro punto cu tabata economia a resalta e falta di agilidad di e opositornan pa reacciona adecuadamente riba ponencia di e partido den gobierno, cu nan a opta pa laga economia crece cu inversion, en bes di austeridad, y cu nan a logra… mientras nos pais ta den su tercer aña consecutivo di recesion economico! Cual crecemento anto? Na momentonan asina por ripara cu falta hopi preparacion ainda across the board ; conocemento cu ta necesario pa por goberna adecuadamente.

Finalmente, kico a keda atras despues cu stof y huma a bay? Un presentacion bastante ekilibra di tanto Evelyn Wever y Otmar Oduber, Mike Eman cu tabatin mester di sala pa loke e no por a pone riba tarima, y algun lider di partido chikito manera Booshi Wever y Holmo Henriquez cu a mehora bastante en comparacion cu e ultimo debate. Manera bisa anteriormente, encuesta y debate no ta decisivo den eleccion. Ta di spera cu e experiencia negativo di e debate no tin consecuencia pa e ambiente general.

You May Also Like

Ken ta mas culpabel? E persona of e sistema?

Despues di e exigencia di cinco aña di prison contra e ex-ministro, como sospechoso ...

Noche Buena…? No pa nos bisiñanan

Papia di ‘Noche Buena’ den e dianan aki cerca nos bisiñanan di sur mester ...

Prome 100 dia ta cuminsa mustra pisa

Tur anterior critica a bira tarea… Di antemano tabata sigur cu e gobierno nobo, ...

Areglo di conflicto den mira atrobe

Den e proximo consulta entre e cuatro parlamentonan di Reino e asunto di e ...

editorial 2_15_1.jpg

Gobierno birando wea di presion? No ta presion di pafo ta haci’e rementa…

Un conocedo di nos sistema politico hopi aña pasa a bisa e palabranan aki ...

Practica integridad ta cos di tur dia

Regla di bon gobernacion ta existi caba Segun nos ta comprende di e update ...