A pesar di e critica opositor riba e presupuesto complementario, esaki a keda aproba, y esey no ta un sorpresa. E resultado di e reportahe pa mitar di 2025 di gobieno ta mustra cu e racha di entrada halto, inicia na 2023, ta continua. Pa promer biaha e pais ta registra un entrada di mas Afl.1.000 miyon den seis luna. Gasto totalden e mesun periodo a keda na Afl. 797 miyon, pa un saldo positivo di Afl. 214 miyon. Si mantene e rumbo aki, nos por mira na 2025 pa di tres biaha consecutivo un saldo positivo riba cuenta di gobierno. Un logro bunita, pero cu a costa nos di otro banda. Pero, tumando na cuenta cu desde aña 2000 nos tabatin solamente 2 aña (2000 y 2003), cu saldo positivo, esey ta significa cu definitivamente nos ta riba bon caminda, o por bolbe atrobe na e mal custumber di gasta mas cu loke tin?

E motibo pa atende esaki ta cu nos pasado cu debe publico no ta di gaba.Mescos hopi otro pais, debe publico a bira den ultimo decadanan un enfermedad contagioso, cu tabata hiba nos, paso pa paso, na un abismo financiero sin precedente. Nos no mester pensa anto cu tres aña di bonanza financiero gubernamental, ocasiona pa un recuperacion economico fuerte y un aumento fuerte di e peso di impuesto riba e ciudadano, lo a libera nos pa semper di e creencia cu debe publico ta algo normal y cu nos por hacie atrobe, pareu nos debe baha na un nivel aceptable. Pa duna un impresion con fuerte e enfermedad aki tabata: den ultimo 25 aña nos tabatin solamente algun aña cu un surplus gubernamental. Na 2000 tabatin un surplus di Afl. 5,4 miyon y na 2003 di Afl. 172,4 miyon; e demas añanan tur tabatin un saldo negativo. Den esey ta resalta sumamente negativo:2004 (Afl.354 miyon), 2013 (Afl. 333 miyon) y 2014 (Afl. 406 miyon). Hasta e añanan bao supervision financiero 2015 – 2017 a mustra ainda un acumulacion di mas di Afl. 500 miyon di deficit.

No ta nada straño cu actualmente nos ta tende tur tipo di comentario, pakico no ta usa e surplus pa esaki o esaya, mientras ta supone cu por lo menos nos parlamentarionan ta na altura cu uso di e surplus ta mara legalmente na pago di debe, pa loke ta e promer porciento di surplus, y despues cada suma riba esey ta bay 50% pa paga debe y 50% pa inversion. Ta remarcable anto cu awor un parlamentario opositor ta opina cu e actual gobierno por a usa e surplus – di mas di 500 miyonacumula na 2023 y 2024 – pa crea un structura salarial mihor pa trahadornan di educacion. Aunke esey ta parce un obhetivo elogiable, no por haci esey bao di e capitulo di inversion, pero esaki ta expresion di e pensamento cu: “awor tin placa – atrobe – ban propone cos pa haci”. No ta pensa riba inversion pero riba cualkier otro asunto cu por propone cu ta politicamente conveniente. Pero, inversion riba su mes ta un tema cu merece mas atencion.

Inversion como ‘sluitpost’ presupuestario?

Si nos tira un vista riba nos pasado recien pa loke ta inversion, compara cu otro gasto, nos por mira un categoria cu ni remotamente ta yega na nivel di otronan. Un impresion: desde 2000 te awe e suma mas halto gasta den un aña tabata Afl. 57,5 miyon na 2012, mientras na 2015 e no tabata yega na mas cu un miserable Afl. 8 miyon. Y tabatin varios aña cu e no tabata mucho mas cu esey tampoco. Esey tin tur cos di haci cu e mentalidad eroneo cu, caso dado, ta corta cu prioridad den inversion, pasobra no ta anticipa un reclamo inmediato di un grupo den comunidad, cu ta bay protesta. Manera den e ehemplo menciona anteriormente, tin un grupo sustancial di profesional den educacion cu merece un adaptacion di nan sistema di pago, cu simplemente no ta di e epoca aki mas. Pero reconociendo esey, bo no por usa placa di inversion pa esey, aunke den propaganda politico por bien yama esey ‘un bon inversion den nos futuro’, pero e no ta. Administrativamente asunto di salario ta keda cay bao di e categoria di ‘gasto di personal’, cu den e caso aki ta reglamenta pa e conocido limite di 10% di nos Producto Interno Bruto (PIB, GDP).

Awor, un bon observador por bisa cu, a pesar cu gobierno tabata dedica casi nada na ‘inversion’, por mira hopi obra grandi realiza, tambe pa gobierno, cu ta un inversion total impresionante. Den esey e lo tin razon, pero con a financia esakinan anto? Aki nos atencion mester bay na e otro tipo di inversion, unda e partner priva cu ta fia gobierno placa, ta diseña, construi y mantene e obra pa cierto periodo, pa despues pasa e propiedad pa gobierno. Esaki ta e conocido ‘Public Private Partnership’ (PPP), cu actualmente tin un paro riba nan, yegando na un nivel menazante pa finanzas publico. Actualmente casi 100 miyon florin ta bayanualmente na paga e debenan aki, sin cu nan ta inclui den e mas di 5.000 miyon di debe publico.

E problema actual ta cu no por recuri na fuente externo asina facil pa financiamento, pero tampoco no ta mira e disposicion di en berdad usa surplus pa inversion, por ehemplo pa e plantanan di purificacion di awa y pa rehabilitacion di San Nicolas. Aki atrobe bon conseho tocante inversion (di CAft) a resulta en vano, pasobra gobierno(nan) ta keda haci debe, aunke scondi.