Pero por presenta alternativa cu ta mantene e nivel igual y esey ta depende na sindicatonan

Hulanda y Aruba a yega na acuerdo riba dos di e tres punto cu tabatin desacuerdo riba nan, segun Prome Minister Evelyn Wever Croes. Esaki tabata su reaccion riba e decision di Hulanda pa no duna sosten di emergencia. Ta un decision cu a cay durante e reunion di Conseho di Minister di Reino cu a tuma luga ayera.

Mester bisa cu Conseho di Minister di Reino a emiti un comunicado di prensa mesora despues di e decisionnan, den cual a enfoca prome riba e decision general pa e paisnan Corsou, St. Maarten y Aruba.

Por ehempel, Aruba no mester cumpli cu e normanan presupuestario pa 2022. Tampoco ta e caso cu Corsou y Sint Maarten. Asina Conseho di Minister di Reino a dicidi ayera. Esey ta nifica cu denter di cierto cuadro, nan por saca mas placa cu ta drenta.

E reglanan presupuestario di e paisnan ta legalmente stipula. A palabra cu Aruba, Corsou y Sint Maarten ta percura pa un presupuesto balansa. Como consecuencia di e pandemia di coronavirus mundialmente esaki no a logra anteriormente den 2020 y 2021.

E paisnan e tempo ey a pidi y a haya aprobacion pa desvia di e palabracionnan. E pandemia persistente y tur consecuencia como resultado, ta pone cu e paisnan atrobe ta pidi autorisacion pa desvia di e rekisitonan stipula y a haya e aprobacion aki.

“Mi ta contento cu hunto cu e paisnan nos por a logra yega na e palabracionnan aki”, asina Secretario di Estado, Alexandra van Huffelen di Relacionnan den Reino ta bisa. Van Huffelen lo ta dia 15 di Februari proximo na Aruba.

E comunicado a sigui bisa cu Hulanda a brinda e paisnan ayudo cu mas of menos un biyon euro na fiansa di emergencia. Constantemente ta duna sosten tambe pa combatimento di COVID-19. Banda di esey Hulanda a yuda cu por ehemplo paketenan di cuminda.

Aruba

Aruba a pidi Conseho di Minister di Reino tambe pa por elimina gradualmente e recorte di 12,5 porciento den salarionan, un di e condicionnan palabra pa sosten di emergencia. Conseho di Minister di Reino no a bay di acuerdo cu esey, entre otro pa motibo cu Aruba ainda ta haci apelacion riba fiansa di sosten di emergencia y no tin un presupuesto balansa. Loke si a palabra ta cu Aruba lo bin cu proposicionnan pa duna e reduccion di salario un otro contenido. Mas aleu ta studia hunto cu e paisnan bao di cua condicionnan riba termino por elimina gradualmente e cortamento den salario.

Reaccion Aruba

Segun Prome Minister Evelyn Wever Croes a pidi pa suspende e recorte cu tabata un di e tres puntonan di desacuerdo. Ea e otro dos punto ta COHO y e nota di cambio y prolongacion di e protocol riba maneho financiero.

Segun mr. Wever Croes a pidi pa para e recorte e aña aki, pa permiti e empleadonan por cuminza haya nan salario back. Segun Conseho di Minister di Reino ainda e no ta oportuno pa stop e recorte, tanten cu Aruba ta depende di sosten di emergencia. “Nos no ta de acuerdo cu esaki. Nos a protesta e ponencia aki. Casi lo por pensa cu tin condicionnan nobo na caminda, cu nos lo no acepta. Nos a palabra pa sigui negocia.”

Pa loke ta e alternativanan cu Hulanda a indica, Prome Minister a bisa cu esakinan mester ta igual na e recorte di 12.6 porciento. “E empleado publico lo por haya cinco (5) porciento di salario atrobe, pero ta entrega e otro mita di e vakantieuitkering y otro prima. Of cu e salario ta aumenta cu cinco porciento atrobe, pero e tin cu entrega dianan di vakantie equivalente na e porcentahe, cu ta 13 dia. Pero otro alternativa ta cu e empleado publico ta haya 2.5 porciento back di salario di tur luna, y a cambio ta entrega 6.5 dia di vakantie. Asina tin diferente alternativa cu si ta cumpli cu e recorte di 12.6 porciento por lo pronto.”

Gobierno lo reuni cu tur sindicato di sector publico pa discuti e alternativanan y wak ki otro proposicion tin. For di sector di enseñansa a compronde cu tin otro alternativa y Gobierno ta habri pa e dialogo, pa purba pa yega na un solucion. Mientrastanto lo sigui delibera cu Hulanda riba e recortenan aki, Evelyn Wever Croes a bisa. “Nos ta sigui insisti riba e tema aki. Awe mes, na nivel ambtelijk ta sigui cu e negociacion,” Prome Minister a bisa ayera, agregando cu e ta spera cu por sali afo.

Pa loke ta e sosten di likides of sosten di emergencia, esaki lo ta riba agenda di Conseho di Minister di Reino aki tres siman. “Gobierno ta satisfecho cu nos a logra acuerdonan riba dos di e tres puntonan y cu e sosten lo keda aproba den e siguiente reunion.”

Presupuesto

Bon Dia Aruba a presenta e pregunta na Minister di Finanzas, Xiomara Maduro kico tur esaki ta haci cu presupuesto 2022. Durante e reunion di Parlamento riba e LIM, Minister Maduro a bisa cu na e momentonan aki ta contestando Raad van Advies y cu pa otro siman lo por presenta e ley na Parlamento cu pa ley, mester a keda presenta prome cu September 1, 2021. Den otro palabra, presupuesto ta sigui laat. Parlamentarionan a señala e punto aki tambe y Minister Maduro a ilustra cu mester reconoce e trabao inmenso di esnan encarga pa prepara presupuesto, mirando e situacion di pandemia y e retonan.

Pero e decision di ayera di Conseho di Minister di Reino pa duna posibilidad di alternativa ta nifica cu mester warda negociacionnan cu sindicatonan pa presenta e decision final na CAft pa aprobacion. Despues di esaki lo haya un bista si lo mester adapta e presupuesto pa 2022.