Recientemente, medionan di comunicacion local tin hopi atencion pa e tema di reapertura di frontera cu Venezuela. Esaki relaciona cu e desaroyonan geopolitico recien, cu a mira caida di lider chavista Nicolas Maduro y un presencia Mericano fuerte na Venezuela.

Diferente medio local a reporta tocante e discusionnan andando den gobierno di Aruba tocante reapertura di frontera cu Venezuela. Esaki despues di añas di tension y incertidumbre.

Frontera cera

E debate actual tocante reapertura di frontera entre Aruba y Venezuela ta yega despues di varios aña di clausura marca pa tension politico, preocupacion economico y consideracion di seguridad.

E situacion a cuminsa na 2018, tempo cu Venezuela temporalmente a cera su frontera maritimo cu Aruba, Corsou y Bonaire, oficialmente citando preocupacion tocante traficacion y comercio ilegal. A pesar cu e clausura aki a dura apenas algun dia, relacion entre Venezuela y e islanan di Reino Hulandes a keda tenso. E situacion a escala na februari 2019, tempo cu presidente Venezolano, Nicolas Maduro a duna ordo pa clausura indefini di e frontera cu e islanan durante e crisis politico tocante entrega di ayudo humanitario na Venezuela. Maduro a acusa e islanan di facilita intentonan di oposicion Venezolano y partnernan internacional pa trece ayudo den e pais.

A pesar cu Venezuela a indica despues cu e frontera cu Aruba por a habri back, gobierno di Aruba a dicidi di mantene e clausura mediante un decreto nacional. For di e punto ey, tur trafico comercial y di pasahero entre Aruba y Venezuela tabata efectivamente suspendi. Manera Bon Dia Aruba a reporta, e frontera a keda cera desde 2019 mientras autoridadnan local tabata evalua e situacion politico y di seguridad na Venezuela.

E clausura tabatin consecuencia economico significante. Pa decadas, Venezuela tabata un partner comercial importante pa Aruba, suministrando fruta, berdura, pisca y material di construccion. E suspension di comercio maritimo y biahe tambe a afecta shipping comercial y a reduci e fluho di bishitante Venezolano na Aruba.

Reapertura parcial

Despues di añas di clausura, discusion tocante reapertura di e frontera a cuminsa gana momentum rond di 2022 y 2023. Gobierno di Aruba a indica cu e frontera no por keda cera indefinidamente, pero a enfatisa cu reapertura lo mester tuma lugar bao condicionnan estricto, incluyendo garantia di seguridad, control di migracion y cooperacion cu autoridadnan Venezolano.

Un prome stap pa normalisacion a yega dia 1 di mei 2023, ora cu a habri back e frontera maritimo pa transporte di carga. Esaki a permiti barco Venezolano reanuda comercio limita cu Aruba, particularmente den producto agricultural y otro producto importa tradicionalmente for di e pais bisiña. Sinembargo, e frontera aereo a keda cera.

Desde esey, gobierno di Aruba ripitidamente a extende e ciere di frontera aereo mientras ta continua studiando e condicionnan necesario pa reapertura. Autoridadnan a punta riba preocupacion tocante fluho di migracion, riesgo di seguridad y e necesidad pa areglonan operacional na aeropuerto.

E pregunta tocante e momento pa reapertura di frontera a bira un debate politico continuo. Sostenedornan ta argumenta cu restaura comercio y biahe por yuda reduci prijs di cuminda, reforsa laso economico regional, y rebiba lasonan comercial tradicional cu Venezuela. Otronan ta urgi cautela, advertiendo cu habri back demasiado lihe por aumenta riesgo relaciona cu migracion ilegal, contrabanda y instabilidad biniendo di e crisis economico y politico na Venezuela.

Cu e caida di Maduro den un operacion militar Mericano dia 3 di januari ultimo, e situacion a tuma un birada inespera.

Hefe di mision di Reino ta “premira” reapertura di vuelo

Varios medio regional a cita Carmen Gonsalves, hefe di mision di Reino, bisando cu ta premira e reapertura di vuelo entre Aruba y Venezuela den proximo lunanan.

“Entre islanan ABC, Venezuela y Reino tin laso historico, cultural, social y familiar importante,” el a bisa den un combersacion cu Roman Lozinski. “…tambe nos ta spera cu den un futuro proximo lo habri back vuelo entre Venezuela y Aruba,” el a revela.

Gonsalves a indica cu e ta den contacto cu gobierno di Aruba, “y nan a conta mi cu nan ta evaluando activamente e situacion tocante reanudacion di vuelo.”

Pa loke ta fecha, e ta spera cu autoridadnan na Aruba ta bay tuma un decision hopi pronto. “E prome minister ta premira di tuma un decision entre mei y juni.”

Frontera cera te “mei-juni”

Diferente medio di comunicacion local tambe a reporta cu prome minister di Aruba, Mike Eman (AVP) a indica recientemente cu ta bay evalua e reapertura di frontera cu Venezuela, y e decision lo yega den lunanan di mei of juni.

Papiando cu prensa local, premier Eman a indica cu e decision anterior ta mantene e frontera cera te cu mei-juni, y pues prome cu juni gobierno lo mester tuma un decision nobo pa sea mantene e ciere, of procede pa un reapertura.

Eman a agrega cu ya a tene combersacion cu director “di e departamento cu ta maneha visas”, kende a indica cu na Caracas tin capacidad pa maneha 8.000 visa. Na e momento aki ta manehando 5.000 visa segun Eman, loke ta indica cu tin espacio pa por acomoda un aumento den aplicacion di visa.

Eman ademas a bisa cu inclinacion di e gobierno actual, e coalicion AVP-Futuro, ta pa habri e frontera, pasobra a mira cu otro paisnan cu tabatin frontera cera cu Venezuela – manera Merca – a habri e frontera back. Segun Eman, si tin un señal biniendo di paisnan grandi cu e situacion ta faborable pa habri e frontera back cu Venezuela, e ora ta dificil pa Aruba bin cu argumento pa mantene e frontera cera. Preparacionnan a cuminsa pa por realisa e repertura di frontera. El a adverti si cu ta keda monitoria e desaroyonan di e situacion.

Importancia di intercambio comercial

Den marco di e desaroyonan aki, Felipe Capozzolo, presidente di Fedecamaras di Venezuela, a indica cu e pais ta spera di fortalece relacion comercial cu Aruba, Corsou y Bonaire.

Den un entrevista cu un medio di comunicacion di Caribe, Capozzolo a indica cu Venezuela tin meta pa reestablece relacion comercial cu mayoria di mercado internacional, y cu e islanan di Reino Hulandes ta representa un partner importante den e strategia aki.

“E mercado di e islanan ABC ta importante pa Venezuela, specialmente manera un canal pa producto agricola y agroindustrial,” e Capozzolo a bisa Cronicas del Caribe.

Capozzolo ademas a resalta e necesidad pa desaroya un sistema logistico mas eficiente y transparente cu ta facilita comercio entre Venezuela y Caribe. Segun Capozzolo, organisacionnan manera Camara di Comercio di La Vela de Coro a desempeña un papel clave den facilita intercambio comercial den ultimo añanan. Sinembargo, el a indica cu pa fortalece comercio, ta bay ta necesario e acompañamento di autoridadnan publico di Venezuela y di e islanan.