Awe nos centro special di Small Well… cu ta conecta ariba cu abou…ta reconoce cu ami Jerwin Mercera Mihor conoci como Carnaval 70 su Prins Show lo priminti di comanda riba Parlamento di Aruba pa e proximo temporada di Carnaval.

Como Rey di tur brug cu ta conecta henter un isla na otro….Presidente di Sabana Basora Dead Zone Condo’s, Emperador di tur Indian den Franse Pas y di tur conocedornan di Mondi Fierno ta cla pa coy Mando pa 2024.

Ami Pancho TIME Samuel Winklaar lombrishi dera den Paradera, pero firme como adjutant Kapitein di Catashi, conservador di National Park y cuidador di Bultos na Boca Prins, Dos Playa y Daimari ta cla pa reparti alegria y Felicidad pa henter Aruba y tambe na esnan cu no ta gusta carnaval.

Hunto nos ta declara cu, nos como lidernan oficial di nos Carnaval 70 ta gradici Gobierno di Aruba pa reconoce pa nos tuma over pais Aruba te cu final di Fakkel di Carnaval 71. Mirando e seriedad di nos dos como hombernan integro y sincero, no ta cla pa afilia nos mes na Gobierno W2 (we two) ta anuncia cu nos lo ta boso candidatonan pa Partido nobo LOLO y ta bin pa kita tur bo DOLO den eleccion binidero defendiendo nos Carnaval y ta cu nos ta Cla pa SHOW TIMEEEE….y corda den 70 tene nos na cuenta…

Awe nos ta decreta den nos idioma nos puntonan pa discucion den parlamento y gobierno di Aruba.

Ami como Prins di Pais Aruba 2024 ta decreta:

1. For di apertura di Carnaval 11-11 mester haci un encuesta na hobennan y mira nan deseo pa haci mas eventonan na nan gusto. Tur siman lo mester duna nan atencion den Minister raad pa nan por vocifera nan deseonan y mester wordo cumpli cu esaki tambe.

2. Nos ta boga pa traha un Comision apart di hoben adulto pa yuda guia Carnaval bek den bario y manda Darren pa contesta telefon pa nos grandi 125 pa un temporada di 3 periodo di Carnaval.

3. Pone conciertonan estilo Romeo Santos pa duna nos tumberonan mas exposure ora artistanan no presenta na ora y nan mester entretene e publico.

4. Pa drecha caminda nan dilanti high rise pa no gaña turistanan cu ta bin bishita nos isla cu e caminda ta traha pa duna ritmo di Caiso den Carnaval

5. Pa pone mas iluminacion den Franse Pas pa por haci parada di luz.

6. Usa COCOLISHI pa organisa workshops di actuacion y con pa conta jokes pa Prins cu Pancho.

7. Parlamento di Aruba mester pone un suma disponible pa asina pidi ex ganadornan di Prins cu Pancho pa bira trainer na talentonan rond di nos isla.

8. Manera cu kima MOMO pa cuminsa cu les di cosemento pa Prins cu Pancho y reinanan. Esaki lo yuda nan baha nan gastonan y pa nan por ricibi nan pañanan na ora tanto pa eleccion como pa paradanan.

9. Mester busca pa Caranaval 70 un bruho pa yuda cu e sacamento di ganadornan di Kavel. Pidi e maestro pa saca e misterio aki via bola di cristal.

10. Forma un comision di terapistanan psicologico, MMA, taekwondo, meditacion spiritual, kickboxing, pa por trece Paz y Alivio entre Musica y SMAC

11. SMAC traha un flota pa reinanan cu no ta pertenece na ningun grupo pa nan por bay paradanan di Carnaval sin ningun problema. Si e reina mester habri parada e lo tin su Carosa y no lo tin bringamento pa bay dilanti of bin di patras. Asina tur reina por stop di carga nomber di grupo hunto cu scol of Districto y por ta nan mes.

12. Ban Kima Momo bek riba diamars cu banda of sound system y mantene nos Carnaval bibo.

13. Pone e Camel Kabubi ta e atraccion principal di nos Carnaval 70. Siña tur mandatario con pa tene e Cabes y blublubluuu… e lo ta un saludo carnavalesco.

Conclusion:
 Carnaval 71 aña lo ta mas largo ta sugeri pa duna Prins cu Pancho maske ta un weekend extra pa drenta den e fever di Carnaval. Nos ta desea pa nos por ricibi mas reconocimento como e monarcanan di Carnaval, esnan cu awe ta ricibi e yabi pa compaña e Reynan. Nos tambe ta conta y nos ta e dirigentenan di carnaval. Duna nos un jeep pa core rond di Aruba y promocional pa un luna e eleccionnan. Haci nos e voceronan di Carnaval.

Nos deseo:

Pa nos por pone mas atencion na e tareanan di Prins cu Pancho di Carnaval. Stop cu Discordia y POLEMICA cu ta destrui en bes di construi nos carnaval. Demostra empatia pa otro, Biba cu Amor, Union, Pas y Nos Dushi Carnival Hunto Nos por Disfrute Sano Conciente y yena cu Ambiente. Ah prome nos termina traha algun sapato triple dek pa nos actual president di SMAC pa ora e enfrenta ken cu ta e por mira nan den nan wowo.

Firma bou di brug grandi na Balashi, cu testigonan di Catashi,

Prins Show y Pancho Time