Segun nos Promer Ministro, logra un presupuesto positivo, cu un surplus di 1 porciento di GDP, lo ta un meta no alcanzable. E opinion expresa ey no ta bin cay for di cielo. Esey ta e opinion cu gobierno di Aruba a expresa caba den su proyeccion multi-anual pa presupuesto, cu mester a inclui den e presupuesto 2022 cu a bay parlamento y awor ta na CAft, pa revisa e ultimo version aproba aki. Esey despues cu e organo di supervision ya a duna opinion riba e presupuesto promer cu esaki a keda presenta na parlamento. Den e evaluacion previo tratamento den parlamento a destaca e yamado di CAft pa trata di baha gasto mas cu tabata e caso segun e presupuesto, cu tabata alrededor di Afl. 290 miyon. No tabatin un debate publico tocante e cifranan den e presupuesto multi-anual, sigur no tocante e disparidad cu tabatin entre loke tabata e ruta delinea pa gobierno di Aruba, un deficit considerable den e añanan venidero, cu un deficit pa financia cu mas debe di alrededor di 500 miyon florin extra, y pa mas tempran un surplus na 2025, di un banda. Di otro banda e surplus cu Hulanda tabata desea di mira na 2022 caba, pero a ‘settle’ pa 2023. Pesey tambe e yamado pa reduci e abismo di casi 300 miyon di deficit na 2022, te na un saldo positivo di mas di 50 miyon, cu ta representa e 1% di GDP. Asina mes, e abismo cu a keda awor cu e deficit e aña aki di alrededor di 230 miyon florin ta parce un hazaña dificil pa realiza otro aña, si no tin medida fuerte.

No ta asina straño anto cu gobierno ta anuncia cu cumplimento cu e surplus na 2023 tampoco ta bay logra. Con e opinion di Hulanda y Aruba lo bay yega cerca di otro den e lunanan nos dilanti, ta e parti menos importante den esaki. Mas importante ta cu a pesar di no yega na un presupuesto balanza otro aña, mucho menos un surplus, tin programa e introduccion di e BTW (VAT), cu ta bay percura pa un aumento enorme di entrada di gobierno. Y esaki den un aña unda cu un parti chikito di aumento di impuesto en general lo ta procedente di crecemento economico, ya cu si tur cos bay bon, e aña aki caba e parti grandi di e recuperacion di turismo lo tuma lugar. Esaki ta parce di indica cu gobierno, envez di atende su gastonan, ta bay organiza un asalto grandi riba cartera di e ciudadano, y esey na un momeno cu inflacion ya ta comiendo den nan poder di compra.

Y pa ilustra con gobierno tranquilamente ta keda aumenta gasto di personal y bienes y servicio, e cifranan cu nan mes a presenta den e presupuesto multi-anual. Pa 2021 gasto di personal tabata 430 miyon florin, mientras bienes & servicio ta 200 miyon florin. Na 2023 e cifranan aki ta aumenta respectivamente te na 458 miyon florin, y bienes y servicio te na 231 miyon florin. Pa 2024 gasto di personal ta keda mescos, pero bienes y servicio ta crece 5 miyon mas. Bisa di otro forma: gobierno ta continua cu su maneho di laga comunidad paga e cuenta y ta conserva e politica di faborece e aparato publico. Claro, tur cos cu miras pa proximo eleccion, pa por bisa cu a cumpli cu e empleado publico…

Y tin algo mas cu e cifranan di gasto di personal. Esey ta cu e suma di Afl. 430 pa 2021, y mas halto pa e añanan despues, no ta representa tur e gastonan di personal, segun e metodo internacional, cu ta inclui tambe e gastonan di e sectornan subsidia, esnan cu contrato laboral y esnan contrata bao di contrato di suministro di servicio, cu basicamente ta gasto di personal tambe. No ta pornada a yega na ‘drop’ e criterio di un suma na florin, di Afl. 479 miyon den e protocol di 2018, pa adopta e norma di 10% di GDP, cu ta algo mas flexible pa traha cune. Pero, e norma aki ta requeri cu ta tuma na cuenta henter e payroll di gobierno, y no solamente e empleadonan di e ministerionan manera ta e caso te awor. Si actualmente a termina 2021 cu un GDO nominal di alrededor di 5200 miyon florin, gobierno por tabatin un maximo di alrededor di 520 miyon florin como maximo…, si tuma na cuenta e payroll completo. Como cu gobierno mes no ta duna informacion di henter e payroll, ultimo biaha cu a haya un resumen completo tabata di IMF algun aña atras. Mientras tanto, Raad van Advies tampoco no ta elabora e resumen completo aki mas, manera tabata e caso te un par di aña pasa. E motibo ta desconoci pa nos. Den e conseho di RvA di 2018 nos ta haya ainda e ultimo resumen cu tabata abarca no menos di Afl. 733 miyon, loke tabata practicamente 50% di e presupuesto di e aña ey. Esey di mes ta duna un otro vista riba e peso di gasto di personal cu e cifra parcial cu gobierno ta maneha.

Tur esaki ta importante pasobra e casi 180 miyon mas cu Aruba na 2023 mester pone riba mesa na impuesto indirecto (gran parti BTW) lo canibalisa cartera di e ciudadano, si no tin tanto crecemento economico, mientras gobierno ta keda hunga e ‘good guy’ pa e empleado publico.

LEAVE A REPLY

Please enter your comment!
Please enter your name here