(Infobae) – “Nos obhetivo inmediato, a medio y largo plazo ta recupera e entrada di trabaonan di forma sostenible y gradual a traves di crecemento productivo tanto den e area di hidrocarburonan como mineria cu ta genera entrada inmediato”, el a declara den un mensahe na e pais.

E presidente encarga di Venezuela, Delcy Rodriguez, a anuncia diahuebs un serie di medidanan pa impulsa economia, cu revision di e modelo chavista, e promesa di un dialogo laboral, un aumento di salario y reformanan den impuesto y mercado inmobiliario. E presidente, ken a asumi poder despues di e captura di Nicolas Maduro conduci pa Merca, a pidi pa corigi “erornan di pasado” y preveni esakinan ripiti.

E salario minimo mensual na Venezuela a keda congela desde maart 2022, ora cu e tabata equivalente na 30 dollar, y actualmente e ta alrededor di 27 cen segun e tasa oficial di cambio, den un contexto di inflacion cronico y devaluacion. Rodriguez a confirma cu na maart un bono mensual pa trabaonan publico a subi for di $160 pa $190, paga den bolivares na tasa oficial y sin impacto riba beneficionan laboral, despues di un operacion di benta di combustible memey di e apertura petrolero y contactonan cu Washington.

E presidente tambe a informa tocante e instalacion di un comision pa “dialogo laboral”, memey di protestanan di trahadonan cu ta exigi aumento salarial. E anuncionan a tuma luga un dia prome cu un marcha convoca pa sindicatonan pa e sede Ehecutivo na Caracas, cu e meta di exigi contesta riba nan exigencia.

Na mesun momento, Rodriguez a ordena creacion di otro comision pa evaluacion “strategico” di e activonan di e pais, cu participacion di Estado, sector priva y trahadonan, aunke el a aclara cu e proceso no lo inclui industria di hidrocarburo. Tampoco e no a detaya funcionnan ni plazonan di trabao di e organismo aki.

E presidente encarga a reitera cu, si “recuperacion di activonan” di Venezuela “blokia den exterior” ser completa den marco di sancionnan internacional, e recursonan aki lo ser destina “inmediatamente pa garantisa e aumento di salario y rehabilitacion di infrastructura basico”, manera electricidad, awa, camindanan, scolnan y hospitalnan.

Rodriguez tambe a impulsa reformanan den e mercado inmobiliario y a firma e ley pa acelera tramite cu parlamento a aproba algun siman pasa. Ademas, el a anuncia e formacion di un conseho nacional economico pa diseña un modelo tributario nobo. “Mi ta spera cu for di e conseho nacional economico aki por sali un modelo tributario nobo di consenso entre tur sector economico di pais”, el a bisa.

Den e marco aki, el a pidi pa e skema tributario nobo ta mas eficiente y pa e promove uso di plataformanan tecnologico pa hiba Venezuela na un “nivel superior”, sin ofrece mas detaye. Varios asociacion empresarial a adverti riba e carga fiscal cu empresanan formal ta enfrenta, cu ta aloca casi 80% di nan ganashi na pago di impuesto.