Recientemente cuater di Aruba su top hungadonan di biyar a competi na Lima, Peru unda a organisa e Campeonato Panamericano di Biyar cu a conta cu un participacion grandi di 330 atleta top di henter e continente America cu e ser representa pa 19 pais participando.
Pa Aruba a competi e miho cuater hungadonan di 2019 esta Gunnar Leonardo #1 riba ranking y Campeon bola 8 & bola 10 di 2019, tambe nos a haya Martin Appeldoorn #2 riba ranking y Sub Campeon bola 9 di 2019, Jorge Petrocchi #3 riba ranking y Sub Campeon bola 8 di 2019 y e lista ta cera cu Jorzhino Everon #4 riba ranking y Campeon bola 9 di 2019. Tur hungado lo a hunga tur 3 disciplina cu ta bola 8-9-10 na Lima. Mester bisa cu e meta di nos hungadonan tabata pa logra nan clasificacion pa Campeonato Mundial di biyar na 2020. Tambe Jorge y Jorzhino lo hunga dobel pa purba clasifica pa mundial otro aña. Nos hungadonan a prepara super bon pa e Panamericano aki unda nan a entrena cinco a seis dia pa siman pa mas o menos 3-4 ora pa dia.
Stichting Sportsubsidie Aruba ta contento di por aporta y brinda e ayudo na e federacion Febiar pa asina nan cuater top atletanan di biyar competi den e Campeonato Panamericano di Biyar na Lima, Peru.
