Recientemente, un delegacion di Parlamento di Aruba a atende e cumbre regional Parlatino. Dos parlamentario, Xiomara Maduro (MEP) y Ruthlyn Victoria Lindor (Futuro) a comparti tocante nan experiencianan na e cumbre.
Parlamentario Xiomara Maduro (MEP) hunto cu un delegacion di Parlamento di Aruba tabata na Parlatino na Panama, pa representa Aruba den e reunionnan di e Comision di Educacion, Cultura, Ciencia, Tecnologia y Comunicacion, na unda a trata algun topico interesante manera “neuroderechos,” “scolnan creativo” y enseñansa pa hobennan cu ta hospitalisa.
Via e foro di Parlatino, ta comparti hopi informacion relevante y ta establece contactonan strategico cu ta beneficia Aruba. Asina Maduro tabatin e placer pa durante e reunionnan di Parlatino por a cera conoci cu e directora di UNESCO na Chile, Sra. Esther Kuisch Laroche kende ta encarga cu e Oficina Regional Multisectorial di UNESCO na Santiago y tambe ta coordinadora di Nacionnan Uni pa Latino America y Caribe.
“Nos a combersa riba e Comision y Secretariado di UNESCO na Aruba di cual expertonan manera Sr. Peter Scholing ta activo como Presidente di Memory of the World MOWLAC y Sr. Marck Oduber ta fungi como Presidente di IOCaribe. Informacion cu ta importante pa comparti ya cu asina por demostra cu Aruba tambe ta activo den busca solucion duradero pa e retonan cu mundo y paisnan chikito manera Aruba ta topa cune,” tabata e palabranan di Parlamentario Xiomara Maduro cu ta describi e balor di e participacion na foro internacional manera Parlatino.
Di su banda, Ruthlyn Victoria Lindor (Futuro) a bisa cu esaki no tabata djis un encuentro, e tabata un plataforma pa intercambia strategianan efectivo y preventivo basa riba solucionnan real. “Pa Aruba, a reconfirma locual Futuro a trece dilanti for inicio: Nos mester actua awor pa proteha nos futuro, prome cu problemanan chikito crece bira dañonan duradero.”
Aruba ta bendiciona. Compara cu algun pais den e region, nos no ta enfrenta crimen horibel manera traficacion di organo. Pero hecho ta: Aunke nos ta un pais chikito y fortuna, nos no ta immuun pa e tipo di crimen nan aki. Aruba ta un hub strategico entre Sur America, Norte America, y Europa, un “trechter” door di cual criminalidad, cu e paisnan grandi ta enfrenta nan mes cune, por y sa pasa. Nos no mester balota nos siguridad. Nos mester protege proactivo, continuamente y cu determinacion, segun Lindor.
“E discusionnan na Panama a confirma un cos riba tur cos: Aruba no ta isola den su retonan, ni den su vision pa un mihor futuro. Nos ta conecta door di un meta comun y parti di un movemento mundial, pa acerca e cuestion di siguridad cu curason, strategia y innovacion,” el a finalisa bisando.
