Ayera tardi un delegacion di representante di nos industria turistico encabesa pa ATA a biaha pa Colombia pa participa den un magno evento organisa dor di Asociacion di Agencianan di Biahe di Colombia (ANATO).
Sr. Demis Rivas kende ta director di benta di Occidental Hotel (Barceló) a declara na Bon Dia Aruba cu e evento aki lo tuma luga den Feria Exposicion di Bogota cu ta un scenario importante na Latino America pa loke ta trata negoshi di turismo.
Entre e paisnan invita ta Mexico y tambe Aruba, pero mas pais di Sur America lo ta presente den e feria aki cu ta cuminsa awe. E ta un momento ideal pa nan topa cu otro y asina revisa e acuerdonan, contractonan y ofrece proposicionnan como e tendencia “high”.
“E ta berdaderamente un bon oportunidad pa cera negoshi, proyecta, formula idea y bin cu sinergia” , segun sr. Rivas
Reto mercado Colombiano y Venezolano
Apesar di e dificultad economico cu algun mercado Latino Americano entre nan Colombia y Venezuela ta pasando aden, e delegacion di Aruba ta bay duna impulso na e promocion di nos producto turistico.
Sr. Rivas a indica cu e reto di e mercado Colombiano tin di haber cu e devaluacion di nan moneda nacional ya cu e prijs di dollar a subi (mas cu 3 mil peso pa dollar) locual ta haci dificil pa e Colombiano lo por biaha. Esaki apesar cu e visa a wordo elimina pa nan por biaha otro paisnan, entre nan Aruba. Pero e ta haya cu mayoria di e turistanan Colombiano cu ta biaha afo ta gosa di bon entrada y semper nan lo biaha afo.
E caso di e mercado Venezolano ta uno conoci tambe. .. “Pero nos interes ta di promove y mantene negoshi” el a bisa. Sr. Rivas a laga sa cu apesar di e dificultad cu e mercado Venezolano ta pasando aden, ainda e confiansa t’ey. Ademas tin mas frecuencia di vuelo y proyecto pa bin cu mas ruta.
Presencia di compania Barceló
Sr. Riva a destaca e importancia cu nan lo por reuni cu nan socionan strategico cu ta aporta nan negoshi na Aruba. Igualmente nan t’ey pa duna Aruba su aportacion como destino. El a bisa cu e compania hotelero unda e ta traha ta den un proceso di transicion y renobacion ya cu Occidental Hotel a wordo adkiri dor di e grupo Barceló Hotel. “Pa nan ta importante pa tin presencia den e destino”, el a declara ayera.
Nan ta trahando duro pa mehora nan producto asina nan lo por yega na e nivel di calidad cu nan ta demanda. Durante henter siman cu nan lo permanece na Bogota pa atende e evento di ANATO lo tin un feria di negoshi cuminsando awe y mañan. Tambe ATA lo tin su tent propio y tambe e compania hotelero Barceló lo tin esun di dje.
El a bisa cu e compania Barceló a haci uzo di su hotelnan mas strategico pa promove nan den e mercado Colombiano. Un facilita tin di haber cu e Colombianonan no mester di visa pa biaha pa Aruba y esaki Occidental Hotel ta wak como mas oportunidad pa expande e presencia di Colombiano den nan hotelnan. “Tambe Colombia ta keda cerca di nos… Nos no por descuida e mercado importante aki, esta Colombia”, el a bisa.
