Dellanire Maduro Lider di Fraccion di POR den Parlamento, ayera tardi a ofrece algun declaracion pa prensa dilanti Parlamento, pa loke ta trata dos peticion cu el a haci den un carta pa presidente di Parlamento, Ady Thijzen.

Den e carta, Maduro a pidi pa Thijzen pone e informacion ter inzage di miembronan di Parlamento, esta algun documentonan cu informacion cu el a expresa por wordo considera di sumo gravedad. Den esaki Maduro ta sigura cu minister di Infrastructura, Desaroyo Teritorial y Medio Ambiente Marisol Lopez-Tromp a comparti esey cu prome minister Evelyn Wever-Croes.

Ademas, pa durante e tratamento di segundo ronda di e reunion publico riba e topico di retiro di confiansa pa minister Lopez-Tromp tambe a pidi pa si tur minister di Gabinete Wever-Croes por ta presente den sala di Parlamento pa asina por haya e claridad necesario riba varios punto di importancia pa pais Aruba.

Tocante diabierna ultimo, cu reunion publico a wordo posponi te proximo aviso, el a trece dilanti cu minister Lopez-Tromp a haci ponencianan y acusacionnan hopi serio, cu ta pone autoridad di gobierno den un posicion hopi fastioso. Y cu nan como parlamento ta wak e acusacionnan aki pa prome biaha. Ta asina cu ta importante pa nan por haya espacio y documentacion di un forma corecto pa nan por repasa esey, Maduro a specifica.

Pa loke ta trata un mediacion di partido POR cu minister Lopez-Tromp, el a ripiti cu ta importante pa nan haya informacion corecto cu mester tuma luga prome pa asina wak con e reunion ta continua.

Ademas, a puntra si nan como parlamento no tabatin conocemento di informacion cu Lopez-Tromp a expresa den reunion publico, pa locual Maduro a menciona cu nan no tabata sa di esey. Esey tabata e prome biaha y ta p’esey cu nan como parlamento mester tuma e trabou ey na serio pa haya e documentonan y sigui cu e reunion hunto cu ministernan di henter gabinete.

LEAVE A REPLY

Please enter your comment!
Please enter your name here