(AP) – Manera e industria di tabaco, azeta, arma di candela, opiod y vaping prome cu nan, e companianan grandi di rednan social na Merca awo ta enfrenta demandanan cu entidadnan publico ta trece dilanti pa nan para responsabel pa e problema grandi societal, den nan caso, e crisis di salud mental den hobennan.

Sinembargo e demandanan nobo, di parti di e districto di scol publico na Seattle siman pasa y otro di un districto priva dialuna, ta enfrenta un caminda legal cu hopi incertidumbre di mesun manera cu varios otro demandanan cu lo por bin den futuro.

Merca su Corte Supremo ta den plan pa trata e argumentonan aki proximo luna tocante e extende na cual e ley federal ta proteha e industria di tecnologia for di e tipo di demandanan aki ora cu e algoritmo di rednan social ta promove cierto tipo di contenido cu ta dañino.

Aunke e corte halto habri e caminda pa e demandanan manera esun di Seattle, e districto tin un desafio grandi pa por comproba e industria su responsabilidad. E industria di tecnologia ta keda insisti cu tin varios manera cu rednan social ta afecta un hoben su salud mental compara cu e rol cu boticanan grandi a hunga den promove e adiccion di opiod.

“E argumento base di esaki ta cu e industria di tecnologia tin e responsabilidad y culpabilidad pa e estado emocional di e hobennan, pa motibo cu nan ta ricibi recomendacionnan pa mira contenido cu a causa nan dano emocional,” Carl Szabo ken ta vice presidente y Consehero General di NetChoice a comenta. “E lo ta absurdo pa demanda Barnes & Noble pa motibo cu un empleado a recomenda un buki cu a causa daño emocional na un hoben of a pone e hoben aki sinti malo. Esaki ta exactamente loke e demanda aki kier haci.”

Scolnan publico na Seattle a demanda e gigantenan tecnologico tras di TikTok, Instagram, Facebook, YouTube y Snapchat, acusando cu nan a crea un dano publico pa medio di dirigi nan productonan na muchanan. Kent School District tambe a entrega un demanda similar riba dialuna.

E districtonan ta culpa e companianan pa empeora e salud mental y desordennan den comportamento di hobennan manera ansiedad, depresion, desorden di alimentacion y bullying cibernetico, cual ta haci hopi mas dificil educa e studiantenan y ta forsa scolnan tuma pasonan adicional manera contrata extra profesionalnan di salud, desaroya plannan di educacion tocante e efectonan di rednan social y provee training adicional na docentenan.

Ley federal ta yuda proteha companianan online for di culpabilidadnan den caso unda dano ta ser causa cu loke otro personanan ta publica riba nan plataforma. Sinembargo e demandanan ta argumenta cu e ley aki no ta proteha e gigantenan su comportamento den e caso aki, mirando cu e dano ta bini for di contenido cu nan mesun algoritmo ta promove.

Aunke Corte Supremo tuma e decision cu e companianan por ser culpa den e tipo di casonan aki, e districtonan di scol lo mester por comproba cu rednan social berdaderamente tabata e causa di e daño causa.

Seattle su demanda ta bisa cu for di ana 2009 te cu 2019, tabatin un aumento averahe di 30 porciento den studiantenan cu ta sinti asina “sin speransa of tristo tur dia pa dos siman of mas tras di otro” cu nan a stop di haci nan actividadnan tipico.

LEAVE A REPLY

Please enter your comment!
Please enter your name here